اداروں کیخلاف اکسانے کا الزام ‘فوادچوہدری ضمانت پر رہا

اسلام آباد(ایجنسیاں)ایڈیشنل ڈسٹرکٹ اینڈ سیشن جج اسلام آباد فیضان حیدر گیلانی کی عدالت نے اداروں کے خلاف اکسانے کے کیس میں گرفتارتحریک انصاف کے رہنما و سابق وفاقی وزیر فوادچوہدری کی 20ہزارروپے مالیتی مچلکوں کے عوض درخواست ضمانت منظور کرلی جس کے بعد انہیں اڈیالہ جیل سے رہاکردیاگیا۔جیل کے باہر کارکنوں نے ان کا شاندار استقبال کیااور پھولوں کی پتیاں بھی نچھاور کیں۔رہائی کے بعد میڈیا سے گفتگو کرتے ہوئے فوادچوہدری کا کہناتھاکہ اگر ارکان اسمبلی غدار ہیں تو محب وطن کون ہے‘اس طرح کے اقدامات سے ملک میں نفرت ہی پھیل سکتی ہے جبکہ ملک پہلے ہی خطرات سے دوچار ہے‘ حکمران طبقہ اور ادارے ہوش کے ناخن لیں اور حالات کو بہتر بنانے کےلئے انتخابات کی تاریخ دیں‘عمران خان کو مائنس کرکے پاکستان کی سیاست کیا رہ جائے گی۔ حکومت کی عوامی مسائل پر کوئی توجہ نہیں، ان کی توجہ عمران خان کو مائنس کرنے پر ہے۔سابق وفاقی وزیر نے کہا کہ اداروں سے کون لڑنا چاہتا ہے، اداروں کے بغیر ملک نہیں چلتے،شاہد خاقان عباسی اور مصطفی نواز کھوکھر نے گرفتاری کی مذمت جس پر ان دونوں کا مشکور ہوں۔