برطانوی رکن پارلیمنٹ کی پاکستانیوں سے متعلق بیان پر معافی

لندن (این این آئی )برطانوی رکن پارلیمنٹ نے پاکستانی صحافیوں اور برٹش پاکستانیوں سے متعلق بیان واپس لے لیا اور مبینہ نسلی پرستانہ بیان پر معافی مانگ لی ہے۔کنزرویٹو پارٹی سے تعلق رکھنے والے رامی رینجر نے برٹش پاکستانیوں کو بچیوں کی گرومنگ میں ملوث اور منشیات فروش کہا تھا۔ گجرات فسادات میں مودی کے کردار پر مبنی بی بی سی کی فلم پر رامی رینجر سیخ پا تھے۔انہوں نے بھارتی وزیراعظم نریندر مودی کے خلاف فلم پر بی بی سی کو ناگواری سے بھرا خط لکھتے ہوئے پوچھا تھا کہ کہیں اس لغو فلم کے پیچھے پاکستانی نژاد اسٹاف تو نہیں۔ رامی رینجر نے کہا تھا کہ 30سے 40لیبر رکن پارلیمنٹ پاکستانیوں کے ووٹ پر انحصار کرتے ہیں۔دوسری جانب لیبر ایم پی ڈوڈز نے کہا ہے کہ بھارتی چینل پر رامی رینجر کا بیان اشتعال انگیز اور نسل پرستانہ تھا، لارڈز کمشنر سے درخواست کی گئی تھی کہ تحقیقات کرائیں کہ رامی رینجرز نے قوانین کی خلاف ورزی تو نہیں کی۔