یوکرین کیلئے ہتھیاروں کی فراہمی پر روس کا اسرائیل کو انتباہ

ماسکو، برسلز (اے ایف پی) روس نے یوکرین کو ہتھیاروں کی فراہمی کے معاملے پر اسرائیل کو متنبہ کیا ہے، یہ انتباہ اسرائیلی وزیراعظم نیتن یاہو کے اس بیان کے بعد سامنے آیا ہے جس میں انہوں نے کہا تھا کہ وہ کیف کو عسکری امداد کی فراہمی پر غور کررہے ہیں اور اس تنازع میں ثالث کا کردار ادا کرنے کیلئے تیار ہیں۔ روسی وزارت خارجہ کی ترجمان ماریا زخارو نے صحافیوں سے گفتگو کرتے ہوئے کہا کہ یوکرین کو اسلحہ فراہم کرنے والے تمام ممالک کو یہ بات سمجھنی چاہئے کہ یہ لوگ روسی افواج کے لئے قانونی اہداف ہوسکتے ہیں۔ یورپی یونین نے روس کیخلاف لڑنے کیلئے تربیت حاصل کرنے والے یوکرینی فوجیوں کی تعداد دگنی کرتے ہوئے 30ہزار کردی ہے۔ 27رکنی یورپی اتحاد نے نومبر میں15ہزار یوکرینی فوجیوں کو تربیت فراہم کرنے کے لئے پروگرام شروع کیا تھا۔ یورپی یونین کے ایک عہدیدار نے بتایا کہ رواں برس کی دوسری سہہ ماہی تک15ہزار فوجیوں کی تربیت کا ہدف مکمل کرلیا جائے گا جبکہ مزید15ہزار یوکرینی فوجیوں کو مختلف یورپی ممالک کی جانب سے تربیت فراہم کی جائے گی۔