آمدن سے زائد اثاثہ جات ، فواد حسن فواداہلخانہ سمیت بری

لاہور (نمائندہ جنگ )لاہور کی احتساب عدالت نے سابق وزیر اعظم نواز شریف کے پرنسپل سیکرٹری فواد حسن فواد کے خلاف عدم شہادت پر انہیں اہلخانہ سمیت آمدن سے زائد اثاثہ جات ریفرنس سے بری کر دیا۔احتساب عدالت کی جج عظمی چغتائی نے فواد حسن فواد کی جانب سے میرٹ پر بری کرنے کی درخواست پر فیصلہ سنایا۔ فواد حسن فواد کے کیس کی پیروی ایڈووکیٹ امجد پرویز نے کی تھی۔ فواد حسن فواد کو جولائی 2018 میں گرفتار کیا گیا تھا۔ نیب نے ساڑھے چار ارب کا ریفرنس داخل کیا جس پر ستمبر 2020 میں فرد جرم عائد کی گئی۔ گرفتاری کے 17 ماہ بعد 21 جنوری 2020 کو ضمانت پر رہائی ملی۔ 13 دسمبر 2022 کو انکے وکیل امجد پرویز نے بریت کی درخواست دائر کی۔ درخواست کہا گیا تھا کہ نیب نے جتنے بھی گواہ پیش کیے ان پر جرح سے یہ ثابت ہوتا ہے کہ کیس خود ساختہ ہے۔ امجد پرویز کا موقف تھا کہ فواد حسن فواد پر جن اثاثوں کی ملکیت کا الزام لگایا گیا وہ ثابت نہیں ہوا۔ نیب رشتے داروں کو فواد حسن فواد کا بے نامی دار بھی ثابت نہیں کر سکا اسلیے ٹرائل کو مزید چلانا بے سود ہو گا۔ عدالت نے امجد پرویز کے دلائل سے اتفاق کرتے ہوئے فواد حسن فواد اور اہل خانہ کو بری کرنے کا فیصلہ سنایا۔