یوکرین کو دیا گیا اسلحہ روسی فوج کا جائز ہدف ہو گا، اسرائیل کو وارننگ

ماسکو (اے پی پی):روس نے اسرائیل کو متنبہ کیا ہے کہ یوکرین کو اسلحے کی فراہمی بحران میں مزید تنائو پیدا کر دے گی۔ روسی خبررساں ادارے کےمطابق وزارت خارجہ کی ترجمان ماریہ زاہرووا نےپریس کانفرنس سے خطاب کرتے ہوئے کہا کہ یوکرین کو اسلحہ فراہم کرنے والے تمام ممالک کو سمجھ لینا چاہیے کہ ہم اس اسلحے کو روسی مسلح افواج کے لئے ایک جائز ہدف قبول کریں گے۔ ہماری پوزیشن ہر کوئی بخوبی سمجھتا ہے لہٰذا یہ حقیقت قبول کر لی جانی چاہیے کہ اسلحے کی اضافی یا پھر نئی فراہمی سے متعلق کوئی بھی قدم بحران میں مزید شدت کا سبب بنے گا۔ ہر ایک کو اس کا احساس ہونا چاہیے۔ واضح رہے کہ اسرائیل کے وزیر اعظم بنیامین نیتان یاہو نے امریکی ٹیلی ویژن چینل سی این این کے لئے انٹرویو میں کہا تھا کہ ہم نے یوکرین کو فوجی امداد فراہم کرنے کا جائزہ لیا ہے اور ہم ایران میں اسلحے کی پیداوار کے مقابل حرکت میں آ گئے ہیں۔