گرفتاری کے باوجود شیخ رشید کا ٹویٹر اکاؤنٹ فعال

راولپنڈی (نمائندہ جنگ) سابق وزیرداخلہ شیخ رشید احمد کی اسلام آباد پولیس کے ہاتھوں گرفتاری کے باوجود انکا ٹویٹر اکاؤنٹ ایکٹو رہا جس پر لمحہ بہ لمحہ ہونیوالی صورتحال کے ویڈیو کلپ اپ لوڈ کئے جاتے رہے ایک کلپ میں شیخ رشید احمد قیدیوں کی وین میں سوار ہوتے وقت بڑے غصے میں ایک پولیس اہلکار کو راستے سے ہٹنے کا کہہ رہے تھے جس پر پولیس اہلکار کا کہنا تھا کہ میں ایس ایچ او ہوں آپ نے بہت بدتمیزی کرلی اور میں نے بہت برداشت کرلی اب نہیں کروں گا تو شیخ رشید نے کہا کہ تم ایس ایچ او نہیں رانا ثناء اللہ کے چمچے ہو پولیس اہلکار نے جواب دیا کہ آپ کے بھی بہت چمچے تھے بیٹھ جاؤ گاڑی کے اندر، دوسری ویڈیو میں شیخ رشید احمد پولیس کی تحویل میں ہونے کے باوجود سگار پیتے دکھائی دیئے، تیسرے ویڈیو کلپ میں پولیس کے حصار میں ہتھکڑی لگے ہاتھ ہوا میں لہراتے جا رہے ہیں، چوتھے کلپ میں کمرہ عدالت سے باہر آتے ہوئے منہ میں سگار ہے اور ہوا میں لہرائے گئے دونوں ہاتھوں میں ہتھکڑی لگی ہوئی ہے اور لوگ ان کے حق میں نعرے بازی کر رہے ہیں جبکہ سلاخوں کے سامنے مسکراتے ہوئے انکی ایک تصویر بھی شیئر کی گئی ہے۔