امن کے لئے تمام جماعتیں متحد ہوجائیں، سلیم سیف اللّٰہ خان

اسلام آباد (جنگ نیوز) سابق وفاقی وزیر اور مشہور سیاسی و سماجی رہنما سلیم سیف اللہ خان نے پشاور دھماکے کی شدید مذمت کرتے ہوئے اس اندوہناک واقعے پر گہرے دکھ اور غم کا اظہار کیا ہے، ان کا کہنا ہے کہ امن کیلئے تمام جماعتیں متحد ہوجائیں ، دہشتگردی کے عفریت سے نمٹنے کیلئے سیاسی اتحاد وقت کی اہم ضرورت ہے ۔ ایک بیان میں شہداء کے لواحقین کےساتھ اظہار تعزیت اور ہمدردی کرتے ہوئے سلیم سیف اللہ نے ملک کے تمام اداروں، سیاست دانوں، مرکزی و صوبائی حکومتوں، علماء اور عوام پر زور دیا ہے کہ اس بڑے خطرے سے نمٹنے کیلئے سب کومل کر ایک قومی بیانیہ اور مشترکہ لائحہ عمل اختیار کرنا چاہئے۔ انہوں نے زخمیوں کی جد صحت یابی کے لئے دعا کی اور ان کے لواحقین کےساتھ ہمدردی کااظہار کیا۔ سلیم سیف اللہ خان نے کہا کہ ہم نے اپنی کوششوں سے اس مسئلے پر بڑی حد تک قابو پالیا تھا اب جبکہ یہ عفریت پھر سے سر اٹھارہا ہے ہمیں مل جل کر فوری طور پر اس کے مکمل خاتمہ کیلئے ہر ضروری اقدام اٹھانا ہوگا۔