ن لیگ الیکشن سے نہیں بھاگ رہی، پی ٹی آئی کو شکست دینگے، افنان اللّٰہ

03 فروری ، 2023

کراچی (ٹی وی رپورٹ) جیو کے پروگرام ’آپس کی بات ‘ میں میزبان منیب فاروق سے گفتگو کرتے ہوئے ن لیگ کے رہنما سینیٹر افنان اللہ نے کہا ہے کہ ن لیگ نہ الیکشن سے ڈر رہی ہے نہ بھاگ رہی ہے، الیکشن میں پی ٹی آئی کا مقابلہ کر کے شکست دیں گے،سینئر تجزیہ کار نصرت جاوید نے کہا کہ تحریک انصاف واقعی سویلین بالادستی کی تحریک چلارہی ہوتی تو ان کی صفوں میں شامل ہوجاتا،عمران خان کو اسٹیبلشمنٹ سے صرف یہ شکایت ہے کہ ہمیں کیوں چھوڑ دیا،سینئر تجزیہ کار محسن بیگ نے کہا کہ پاکستان میں سیاسی قوتوں کو خودمختارانہ کام کرنا چاہئے، ریاستی ادارے امن و امان سمیت باقی ایشوز پر حکومت کو سپورٹ کریں لیکن سیاسی مداخلت نہیں ہونی چاہئے۔ ن لیگ کے رہنما سینیٹر افنان اللہ نے کہا کہ ہماری خواہش نہیں تھی کہ کوئی ہمیں اقتدار میں لاکر بٹھائے، ہم چاہتے ہیں فوج مکمل طور پر غیرسیاسی ہو، ہم اسٹیبلشمنٹ کو سیاست میں ملوث نہیں کرنا چاہتے، پورا پاکستان جانتا ہے جنرل فیض حمید سمیت دیگر لوگ پی ٹی آئی کو سپورٹ کررہے تھے، وزیراعظم ہاؤس میں ایک آفیسر وزیراعظم کی ریکارڈنگ کرکے بہاولپور بھیج رہا ہوتا تھا، کورکمانڈر بہاولپور کو کیا اختیار ہے کہ وزیراعظم پاکستان کی کالز ریکارڈنگ کروائے، انہوں نے فوج اورا نٹیلی جنس ایجنسیوں کو اپنے گھر کی لونڈی کی طرح استعمال کیا، ن لیگ بغیر کسی کی مدد کے اپنے زوربازو پر الیکشن جیتے گی، میری ذاتی رائے میں ہمیں صوبائی اسمبلیوں کے انتخابات میں جانا چاہئے، ن لیگ نہ الیکشن سے ڈر رہی ہے نہ بھاگ رہی ہے، الیکشن میں پی ٹی آئی کا مقابلہ کر کے شکست دیں گے۔ سینئر تجزیہ کار نصرت جاوید نے کہا کہ تحریک انصاف واقعی سویلین بالادستی کی تحریک چلارہی ہوتی تو ان کی صفوں میں شامل ہوجاتا،عمران خان کو اسٹیبلشمنٹ سے صرف یہ شکایت ہے کہ ہمیں کیوں چھوڑ دیا۔