اسلام آبادہائیکورٹ،مقدمات کی اسلام آبادسے مری اورکراچی منتقلی روکنے کیلئے شیخ رشیدکی درخواست اعتراضات لگاکرواپس

اسلام آباد(جنگ رپورٹر) سابق صدر آصف زرداری پر عمران خان کے قتل کی سازش کا الزام لگانے سے متعلق مقدمہ کا سامنا کرنے والے شیخ رشید نے اسی حوالے سے مری اور کراچی کے تھانوں میں درج دو مزید مقدمات اسلام آباد سے کراچی اورمری منتقلی روکنے کیلئے اسلام آبادہائیکورٹ میں آئینی درخواست دائر کردی ہے تاہم عدالت نے اعتراضات عائد کرتے ہوئے درخواست واپس کردی ہے ،ملزم شیخ رشید نے ہفتہ کے روز سردار عبد الرازق خان ایڈووکیٹ کے ذریعے دائر درخواست میں اسلام آباد،سندھ اور پنجاب کے پولیس سربراہان اور وفاقی سیکرٹری داخلہ کو فریق بناتے ہوئے موقف اختیار کیا ہے کہ پی ٹی آئی کے سربراہ عمران نے آصف زرداری پر قتل کا الزام لگایاہے ، جس کا میں نے حوالہ دیا تھا،میرے خلاف مقدمات میں مدعی متاثرہ فریق نہیں،درخواست گزار نے استدعا کی ہے کہ سیاسی بیان بازی کی بنا ء پر اس کے خلاف مزید مقدمات درج کرنے سے روکا جائے،جبکہ تھانہ آبپارہ ، مری اور کراچی میں درج ایف آئی آرز کوبھی غیر قانونی قرار دیکر کالعدم قرار دیا جائے ،درخواست گزار نے مزید استدعا کی ہے کہ کراچی کے تھانے میں درج ایف آئی آر کا اندراج اختیارات سے تجاوز قرار دیا جائے یا اسلام آباد منتقل کیا جائے، اس مقدمہ کے کے حتمی فیصلے تک درخواست گزار کو کراچی پولیس کے حوالے کرنے سے روکا جائے،تاہم رجسٹرار آفس نے ملزم کی درخواست پر اعتراضات عائد کرتے ہوئے قرار دیاہے کہ دوسرے صوبوں میں درج مقدمات اس عدالت کے دائرہ اختیار سے باہر ہیں۔