ناجائز ٹیکسز لگائے گئے تو احتجاجی تحریک کا آغاز کرینگے، تنظیم تاجران

اسلام آباد( نامہ نگار) مرکزی تنظیم تاجران پاکستان کے صدر کاشف چوہدری ،چیرمین خواجہ سلمان صدیقی نےکہا ہے کہ اگر آئی ایم ایف کے ایماء پر کروڑوں عوام اور تاجروں پر اربوں روپے کے مزید ناجائز ٹیکسز لگائے گئے تو ملک بھر کے تاجر 13فروری سے ملک بھر میں احتجاجی تحریک کا آغاز کریں گے جبکہ انہوں نے مقتدر حلقوں سمیت تمام اسٹیک ہولڈرز سے مطالبہ کیا ہے کہ وطن عزیز کو لوٹنے والے سیاست دانوں اور اشرافیہ کی بیرون ممالک میںموجو د قومی دولت کو واپس لانے کیلئے ایمنیسٹی دی جائے اور ریاست پاکستان کو آئی ایم ایف اور ورلڈ بینک سے قرض لینے کیلئے بجائے ان سے قرض لیکر انہیں منافع دینا چاہئے اور کہا کہ صدر مملکت ، وزیر اعظم ، چیئرمین سینٹ ، اسپیکر قومی اسمبلی ، ممبران قومی و صوبائی اسمبلی ، سینیٹرز ، ججز ، جرنیلوں ، بیوروکریٹس ،عوامی نمائندوں کی تنخواہیں فوری بند کی جائیں اور انہیں فراہم کی جانے والی مراعات کو آدھا کر دیا جائے، غیر پیداواری اخراجات پر پابندی لگائی جائے اور ریاست اپنے 50فیصد اخراجات کم کرنے کا اعلان کرے ،لانگ ٹرم اور شارٹ ٹرم ملکی معاشی پالیسیاں بنائی جائیں۔ ان خیالات کا اظہار انہوں نے اسلام آباد کے مقامی ہوٹل میں ʼʼ بدترین ملکی معاشی صورتحال ، اسباب اور حل ʼʼکے عنوان سے منعقدہ پریس کانفرنس میں کہا ، پریس کانفرنس میں ملک بھر سے تاجر نمائندوں نے بھرپور شرکت کی۔مرکزی تنظیم تاجران پاکستان کے چیئرمین خواجہ سلمان صدیقی ،شرجیل میر صدر پنجاب و دیگر موجود تھے ۔