شہباز اور مریم نواز کی ملاقات، ناراض ارکان کو منانے کا فیصلہ

لاہور،اسلام آباد(نمائندہ جنگ،جنگ نیوز) وزیراعظم شہباز شریف سے مسلم لیگ (ن) کی سینئر نائب صدر و چیف آرگنائزر مریم نواز شریف نے ملاقات کی۔ ذرائع کے مطابق ملاقات میں پارٹی کے ناراض رہنماؤں کو منانے کا فیصلہ کیا گیا، دوسری جانب وزیر اعظم شہباز شریف سے مولانا فضل الرحمن نے بھی ملاقات کی ہے جس میں انہوں نے وزیر اعظم کو ضمنی الیکشن میں حصہ نہ لینے کا مشورہ دیا ہے ۔ مریم نواز سے ملاقات میں پارٹی کی تنظیم سازی ،ورکرز کنونشنز سمیت مجموعی صورتحال پر تبادلہ خیال کیا گیا، بتایا گیا ہے کہ قیادت نے پارٹی کے سینئر رہنما شاہد خاقان عباسی کے تحفظات دور کرنے کا فیصلہ کیا ہے اور شہباز شریف نے مریم نواز کو شاہد خاقان عباسی سے جلد ملاقات کی ہدایت کر دی ۔ ذرائع کے مطابق ملاقات میں پنجاب اور خیبرپختونخوا کے ممکنہ انتخابات کے معاملے پر بھی تفصیلی گفتگو ہوئی ۔ ذرائع کے مطابق ملاقات میں ملک کی معاشی اورمہنگائی کی صورتحال کے حوالے سے بھی بات چیت کی گئی۔علاوہ ازیں وزیر اعظم محمد شہباز شریف سے جمعیت علما اسلام (ف) کے سربراہ مولانا فضل الرحمن نے رائے ونڈ میں ملاقات کی۔ ملاقات میں ملک کی مجموعی سیاسی صورتحال اور باہمی دلچسپی کے امور پر تبادلہ خیال کیاگیا۔جمعیت علماء اسلام (ف) کے سربراہ مولانا فضل الرحمان نے کہا ہے کہ پی ڈی ایم کو قومی اسمبلی کے آئندہ ماہ ہونیوالے ضمنی انتخابات میں حصہ نہیں لینا چاہئے۔انہوں نے کہ پنجاب و خیبر پختونخوا میں امن و امان اور اقتصادی صورتحال کو دیکھتے ہوئے ہی الیکشن کمیشن کو انتخابات کی تاریخ دینی چاہئے ۔