10سال تک سیاسی استحکام سے ملکی ترقی ممکن ہے، احسن اقبال

لاہور ( جنر ل رپورٹر)وفاقی وزیر منصوبہ بندی احسن اقبال نے کہا ہے کہ دس سال تک سیاسی استحکام سے ہی ملکی ترقی ممکن ہو سکتی ہے، ملک میں سیاسی تبدیلی سے معاشی پالیسی پھل پھول نہ سکی، عالمی مارکیٹ اگر پاکستان پر بھروسہ نہیں کرے گی تو معیشت اور کاروبار نہیں چل سکتا،سی پیک گیم چینجر منصوبہ ہے،چین نے ہر مشکل وقت میں پاکستان کی مدد کی ۔ان خیالات کا اظہار انہوں نے لاہورمیں ʼʼاکنامک رائونڈ ٹیبل کانفرنسʼʼ سے خطاب کرتے ہو ئے کیا۔وفاقی وزیر نے کہا کہ سابق حکومت میں توانائی کے منصوبے نہیں لگے، ماضی میں کرنٹ اکائونٹ خسارہ سے معاشی مسائل بڑھ گئے۔ انہوں نے کہا کہ تھر کول ایران اور سعودی عرب سے تیل سے بڑاخزانہ ہے،تھرل کول منصوبہ سستی بجلی فراہم کر نے کا بہت بڑا ذریعہ ہے، ہم نے ونڈ ،ہائیڈرل اور سولر سے بھی توانائی میں اضافہ کیا، ایک شخص نے مجھ پر ملتان سکھر موٹروے میں ستر ارب روپے کرپشن کا الزام لگایا ۔ عمران خان کے چار سالوں میں ایک ڈالر ملک میں نہیں آیا ۔ انہوں نے کہا کہ پی ٹی آ ئی کے چار سالوں میں پاکستان پر دنیا کا بھروسہ ختم ہوگیا، پاکستان کی دھکا سٹارٹ معیشت کو انجن کی بیٹری تبدیل کرکے لگانا ہوگی، دھکا سٹارٹ اب زیادہ دیر نہیں چلے گی سپورٹ کی بیٹری معیشت میں لگانا ہوگی۔