مقبوضہ کشمیر میں جلد امن اور خوشحالی کا سورج طلوع ہوگا، مقررین

کوئٹہ( اسٹاف رپورٹر)مقبوضہ کشمیر پاکستان کی شہ رگ ہے ‘ کشمیر کی آزادی کشمیریوں کا بنیادی حق ہے اور دُنیا کی کوئی طاقت کشمیریوں کو ان کے حق خود ارادیت سے محروم نہیں کر سکتی ۔ پاکستانی قوم اپنے کشمیری بھائیوں کی آزادی کی اس جدوجہد میں شانہ بشانہ ہے ۔ کشمیری بھائیوں کی قربانیاں رائیگاں نہیں جائیں گی ۔ ان خیالات کا اظہارآل پارٹیز حریت ‘فریڈم کانفرنس آزاد کشمیر کے ایگزیکٹو ممبر زاہد صافی،ڈائریکٹر بیورو آف کریکولم سعید احمد خان ایڈیشنل ڈائریکٹر زاسفند یار خان بادینی اور دار و خان بڑیچ نے یوم یکجہتی کشمیر کے حوالے سے تقریب سے خطاب میں کیا۔مقررین نے کہاہے کہ گزشتہ سات دہائیوں سے کشمیری عوام جس طرح بھارتی سرکارکے ظلم و ستم کا شکار ہے وہ نہایت ہی قابل مذمت ہے۔ کشمیریوں کی جدوجہد آزادی کو دبانے کیلئے بھارت آئے روز نئے ہتھکنڈے استعمال کر رہا ہے ۔ جس طرح مقبوضہ کشمیر کے مظلوم عوام اپنی جدوجہد آزادی کیلئے بھارتی فوج کا مقابلہ کر رہے ہیں وہ قابل تعریف ہیں۔ اُنہوں نے کہاکہ انشاءاﷲ ان کی جدوجہد ضرور کامیاب ہو گی اور کشمیری بھائی امن او ر خوشحالی کے ساتھ ایک نئی اور آزاد زندگی کا سفر جلد شروع کریں گے ۔ اُنہوں نے کہاکہ اقوام عالم کا فرض ہے کہ وہ بھی مقبوضہ کشمیر کے مظلوم عوام کی آواز بنیں تاکہ بھارت پر یہ بات واضح ہو جائے کہ دُنیا ریاستی جبر کے خلاف مقبوضہ کشمیر کے عوام کے ساتھ ہے اور ان کے اُصولی موقف کی تائید کر تی ہے۔ انہوں نے انسانی حقوق کے بین الاقوامی اداروں پر زور دیا ہے کہ وہ کشمیری عوام کو اپنے مستقبل کا فیصلہ کرنے کا حق دیں اور اس سلسلے میں اقوام متحدہ کی قرار دادوں پر من و عن عمل درآمد یقینی بنایا جائے۔ انہوں نے کہا کہ مظلوم کشمیریوں کی جانب سے آزادی کی پرامن تحریک انسانی حقوق کے حصول کی ایک لازوال جدوجہد اور مثال ہے جسے کسی صورت دبایا نہیں جاسکتا ۔اُنہوں نے عالمی طاقتوں پر ایک بار پھر زور دیتے ہوئے کہا ہے کہ وہ کشمیری عوام کی آزادی کی اس تحریک کو پایہ تکمیل تک پہنچانے کے لئے اپنا مثبت کردار ادا کریں۔