جدید دور کے چیلنجز کا مقابلہ معیاری تعلیم کے ذریعے ممکن ہے‘معصومہ حیات

کوئٹہ(پ ر) پشتونخوا میپ کی سابق رکن صوبائی اسمبلی معصومہ حیات نے کہا ہے کہ تعلیم نسواں کو فروغ دیکر جدید دور کا مقابلہ کیا جا سکتا ہے ۔ ویمن یونیورسٹی کی وائس چانسلر پروفیسر ڈاکٹر ساجدہ نورین کی کاوشوں سے صوبے میں معیاری تعلیم کو فروغ مل رہا ہے ۔ ایک بیان میں انہوں نے کہا کہ یونیورسٹی میں طالبات کی انرولمنٹ میں اضافہ خوش آئند امر ہے اس سے صوبے میں نہ صرف تعلیمی معیار بلند ہوگا بلکہ شعور و آگہی کو بھی فروغ ملے گا انہوں نے امید ظاہر کی کہ ویمن یونیورسٹی آئندہ بھی صوبے میں معیاری تعلیم کے فروغ کیلئے اپنا کردار ادا کرتی رہے گی کیونکہ موجودہ صدی علم و ہنر کی ہے اور جدید دور کے چیلنجز کا مقابلہ صرف تعلیم کے ذریعے ممکن ہے ۔ انہوں نے کہا کہ بلوچستان میں نظام تعلیم کو جدید خطوط پر استوار کرنے کے ساتھ معیار بہتر بنانا ہوگا تا کہ یہاں کے بچوں کو اعلی تعلیم کیلئے دیگر صوبوں کا رخ نہ کرنا پڑے انہوں نے تعلیم کے فروغ کیلئے اپنی جماعت کی جانب سے وی سی ویمن یونیورسٹی کو ہر ممکن تعاون کا یقین دلایا۔