فورٹیفائیڈ فوڈ کے استعمال کے لئے آگاہی کی ضرورت ہے‘ظفر اللہ

کوئٹہ ( اسٹاف رپورٹر)ڈائریکٹر محکمہ خوراک ظفر اللہ نے کہا ہے کہ شہریوں میں فورٹیفائیڈ فوڈ کے استعمال کے لئے آگاہی کی ضرورت ہے تاکہ شہریوں کی جانب سے فورٹیفائیڈ آٹے کی ڈیمانڈ ہو تو فلور ملز سمیت تاجر بھی فورٹیفائیڈ فلور کر ترجیح دیں گے۔ان خیالات کا اظہار انہوں نے پشین ریسٹ ہاوس میں آگاہی سیمینار سے خطاب کرتے ہوئے کیا ، تقریب نیوٹریشن انٹرنیشنل کے پروگرام منیجر ڈاکٹر عرفان اللہ ، صوبائی پروگرام منیجر محمد قوی خان ، فلور ملز ایسوسی ایشن کے عہدیدار بدر الدین کاکڑ سمیت کوئٹہ اور پشین سے تعلق رکھنے والے مل مالکان نے شرکت کی ۔ ڈائریکٹر محکمہ خوراک ظفر اللہ نے کہا کہ بلوچستان کی آبادی دیگر صوبوں کی نسبت کم ہے کوئٹہ اور پشین میں قائم فلور ملز کسی حد تک اس آبادی کے لئے آٹے کی فراہمی کو یقینی بنارہے ہیں ،فورٹیفائیڈ آٹا انسانی جسم کے لئے ضروری ہے ، محکمہ خوراک فلور ملز مالکان سے ملکر فورٹیفائیڈ فوڈ کی فراہمی کو یقینی بنائے گی ،سندھ اور پنجاب سے آٹا درآمد کیا جاتا ہے جس کے لئے ضروری ہے کہ پنجاب اور سندھ سے درآمد ہونیوالا آٹا بھی فورٹیفائیڈ ہو ۔نیوٹریشن انٹرنیشنل کے پروگرام منیجر ڈاکٹر عرفان اللہ نے سیمینار سے خطاب کرتے ہوئے کہا کہ نیوٹریشن انٹرنیشنل اور فلور ملز مالکان کے درمیان سیشن منعقد کرنے کا مقصد ملز مالکان میں فورٹیفائیڈ آٹا کی اہمیت اور افادیت کو اجاگر کرنا ہے ، انہوں نے کہا کہ سیشن میں نہ صرف فلور ملز مالکان کو آگاہی دی گئی بلکہ فورٹیفائیڈ اور معیاری آٹے کے استعمال اور اس کی افادیت کو ترجیحات میں شامل کرنے پر زور دیا گیا ۔