بھارت کی بڑے پیمانے پر جدید اسلحہ کی خریداری ، میزائل ، توپیں بھی شامل

نئی دہلی(این این آئی)بھارت نے ساڑھے 8ارب ڈالر کے فوجی ہتھیاروں کی خریداری کی منظوری دے دی جن میں میزائل اور توپیں بھی شامل ہیں ۔ بھارتی وزارت دفاع نے ایک بیان میں کہا ہے کہ ساڑھے 8ارب ڈالر مالیت کے200 براہموس میزائل، 50 ہیلی کاپٹر،الیکٹرانک وارفیئر سسٹم ، آرٹلری گنز اور آرٹلری جنگی نظام کی خریداری کی منظوری دے دی گئی ہے۔وزیر اعظم نریندر مودی کی حکومت کی طرف سے مقامی سطح پر دفاعی سازوسامان کی تیاری کو فروغ دینے کے لیے تمام آرڈر بھارتی کمپنیوں کو دیے جائیں گے۔ اربوں ڈالر کی اس رقم میں بحریہ پر خاص توجہ مرکوز کی گئی ہے، جس کے لئے 560 ارب روپے کی منظوری دی گئی ہے ۔منظور شدہ خریداریوں کی فہرست میں بحریہ کے لئے 200 اضافی براہموس میزائل، 50 یوٹیلیٹی ہیلی کاپٹر اور الیکٹرانک وارفیئر سسٹم شامل ہیں۔بھارتی فوج کے لئے ہتھیاروں کے حصول کی منظوری دینے والی دفاعی حصول کی کونسل نے ڈیزل میرین انجن کی تیاری کی بھی منظوری دی ۔اس کے علاوہ فوج کو 155ایم ایم/52 کیلیبر کے 307 یونٹوں کے ساتھ ہائی موبلٹی وہیکلز اور گن ٹونگ گاڑیاں خریدنے کی منظوری بھی مل گئی ہے۔