عمران خان آج پیش ہونگے،ضلع کچہری سےعدالت جوڈیشل کمپلیکس منتقل

اسلام آباد (خصوصی رپورٹ،خصوصی نامہ نگار) تحریک انصاف کے چیئرمین عمران خان آج توشہ خانہ کیس کی سماعت کے موقع پر ایڈیشنل سیشن جج اسلام آباد ظفر اقبال کی عدالت میں پیش ہوں گے، ایڈیشنل ڈسٹرکٹ اینڈ سیشن جج کی عدالت جوڈیشل کمپلیکس میں منتقل کی گئی ہے جہاں پر عدالت نمبر ایک میں کیس کی سماعت ہو گی۔700پولیس اہلکاروں سمیت رینجرزتعینات،جوڈیشل کمپلیکس کے اطراف رات گئے سرچ آپریشن کیا گیا، سابق وزیر اعظم عمران خان نے ضلع کچہری اسلام آباد ایف ایٹ میں سکیورٹی خدشات کا اظہار کر رکھا ہے جس کی وجہ سے اس عدالت کو جوڈیشل کمپلیکس منتقل کیا گیا ہے۔ ایڈیشنل سیشن جج اسلام آباد ظفر اقبال نے عدم پیشی پر عمران خان کے ناقابل ضمانت وارنٹ جاری کئے تھے تاہم جمعہ کو اسلام آباد ہائی کورٹ نے عمران خان کو عدالتی اوقات کار کے دوران پیش ہونے کی شرط پر گرفتار نہ کرنے کی ہدایت جاری کی ہے اور پولیس و انتظامیہ کو سیکورٹی فراہم کرنے کا کہا ہے۔