ڈاک ملازمین اعزازیہ قیادت نے مسترد کر دیا، سرکلر واپس لینے کامطالبہ

اسلام آ باد ( نیو زرپورٹر)پاکستان پوسٹ نے ملک بھر میں ڈاک ملازمین کیلئے اعزازیہ کا سرکلر جاری کر دیا۔ ملازمین یونینز کے خدشات درست ثابت ہوئے اور بیشتر بجٹ پوسٹل ہیڈکوارٹر کے 350ملازمین و افسران کو ایک کروڑ 76لاکھ روپے الاٹ کر دیا گیا جبکہ ملک بھر کے 30ہزار سے زائد ملازمین ڈاک کیلئے ایک کروڑ 47لاکھ روپے مختص کئے گئے ہیں۔اعدادوشمار کے مطابق پوسٹل ہیڈ کوارٹر کے افسران اور ملازمین کو اوسطاً 50ہزار روپے اور ملک بھر کے ملازمین و افسران کو اوسطاً 500 روپے ملیں گے۔ شمالی پنجاب سرکل راولپنڈی کے 3791 ملازمین کو 19 لاکھ 38 ہزار، اسلام آباد اور گلگت بلتستان کے 1900 ملازمین کیلئے 8 لاکھ 82 ہزار، خیبرپختونخوا سرکل 3721 ملازمین کیلیے 23لاکھ، سنٹرل پنجاب 8426 ملازمین کیلئے 38 لاکھ 66 ہزار روپے، کراچی سرکل 4844 ملازمین کیلئے 20 لاکھ روپے، ملتان سرکل 270 ملازمین کیلئے 13 لاکھ 71 ہزار مختص کئے گئے ہیں۔ ایپکو یونین کی مرکزی اور سرکل قیادتوں نے اس سرکلر کو مسترد کرتے ہوئے اسے امتیازی سلوک قرار دیا ہے۔ ڈائریکٹر جنرل کے نام عرضداشت میں کہا گیا ہے کہ انتظامیہ کو کچھ عرصہ قبل تحریری باور کرایا تھا کہ اعزازیہ کی منصفانہ تقسیم یقینی بنائی جائے لیکن فیلڈ سٹاف سےسوتیلی ماں جیسا سلوک کیا گیا اسلئے یہ سرکلر فوری واپس لے کر اعزازیہ مساوی تقسیم کیا جائے ورنہ احتجاج کی کال دی جائے گی۔