شہر میں تجاوزات کی بھرمار ،سڑکوں ،فٹ پاتھ پر قبضوں سے عوام پریشان

راولپنڈی (نمائندہ جنگ) راولپنڈی میں تجاوزات اور غیرقانونی تعمیرات نے پورے شہر میں نظام زندگی درہم برہم کر دیا ۔ انتظامیہ کی طرف سے فرضی دعوئوں اور اعلانات کا فائدہ اٹھاتے ہوئے تجاوزات مافیا فٹ پاتھ اور سڑکوں تک پہنچنے کے بعد اب گلی محلوں تک جا پہنچا ہے۔ دوسری طرف کارپوریشن اور ضلعی انتظامیہ کے افسران اس سلسلے میں تقریباً روزانہ کی بنیاد پر ہونے والے اجلاس میں تجاوزات کیخلاف سخت کارروائی اور کسی ایک سڑک کو ماڈل بنانے کا اعلان کر دیتے ہیں لیکن عملاً کچھ بھی ہوتا دکھائی نہیں دے رہا۔ مری روڈ، سرکلر روڈ، کمرشل مارکیٹ، جامع مسجد روڈ، گنج منڈی روڈ، اقبال روڈ، نمک منڈی، سٹی روڈ، صادق آباد، مسلم ٹائو، پیرودھائی، گوالمنڈی، کالج روڈ اور اڈیالہ روڈ سمیت شہر کی دیگر پچاس پچاس فٹ چوڑی سڑکیں تجاوزات کی وجہ سے اکثر سنگل گاڑی گزرنے کیلئے بھی دستیاب نہیں ہوتیں۔ شہریوں کا کہنا ہے کہ کارپوریشن میں بیٹھے بدعنوان عملے کی سرپرستی کے بغیر تجاوزات اور غیرقانونی تعمیرات کسی صورت ممکن نہیں، جب تک میونسپل کارپوریشن کی مخصوص سیٹوں پر تعینات بعض بااثر مخصوص افسر تبدیل نہیں کئے جاتے تب تک صرف اجلاسوں میں ہی شہر کی سڑکیں ماڈل بنتی رہیں گی۔