سروس سٹرکچر اور ترقی پالیسی دی جائے یونیورسٹیز بی پی ایس ٹیچرز ایسوسی ایشن

اسلام آباد (خصوصی نامہ نگار) آل پاکستان یونیورسٹیز بی پی ایس ٹیچرز ایسوسی ایشن کے صدر ڈاکٹر سمیع الرحمان نے کہا ہے کہ ایچ ای سی قومی سٹینڈنگ کمیٹی تعلیم میں کرائی گئی اپنی یقین دہانی پر عملدرآمد میں سنجیدہ نہیں۔ ایچ ای سی حکام کے ملک کی سرکاری جامعات کے بی ایس ٹیچرز کیلئے سروس سٹرکچر اور ترقی کیلئے پالیسی میں تاخیری حربے افسوسناک ہیں۔ نیشنل پریس کلب میں جنرل سیکرٹری ڈاکٹر امتیاز احمد‘ سیکرٹری اطلاعات ڈاکٹر منظور احمد اور دیگر کے ہمراہ پریس کانفرنس کرتے ہوئے ڈاکٹر سمیع الرحمان نے کہا کہ 3برس سے احتجاج کر رہے ہیں۔ 30اپریل تک مطالبات پورے نہ کئے گئے تو احتجاجی تحریک چلانے پر مجبور ہونگے۔ اس موقع پر اپوبٹا مرکزی تنظیم سمیت دیگر نومنتخب عہدیداروں نے بھی اپنے عہدوں کا حلف اٹھایا۔