آر پی او کی اشتہاری مجر موں کی گرفتاری مہم تیز کرنے کی ہدایت

اٹک (نمائندہ جنگ) آر پی او راولپنڈی سید خرم علی نے کہا ہے کہ اٹک پو لیس قتل، ڈکیتی، چوری، ریپ اور دیگر سنگین مقدمات میں کرائم سین یونٹ اور جدید سائنسی طریقے استعمال کرتے ہوئے ملزمان کی فوری گرفتاری کو یقینی بنانے کے سلسلہ میں تمام وسائل بروئے کار لائے۔ وہ ڈی پی او آفس اٹک میں کرائم میٹنگ کی صدارت کر رہے تھے۔ اس موقع پر ڈی پی او ڈاکٹر سردار غیاث گل خان، ایس پی انوسٹی گیشن اٹک جویریہ محمد جمیل، ڈی ایس پیز اور 14تھانوں کے ایس ایچ اوز نے شرکت کی۔ انہوں نے ضلع بھر میں درج مقدمات کا جائزہ لیتے ہوئے اشتہاری مجرمان  کی گرفتاری کیلئے مہم کو تیز کرنے کے احکامات جاری کئے۔ گاڑیوں اور موٹر سائیکلوں کی چوری میں ملوث گینگز کی گرفتاری کیلئے مزید جذبے اور لگن سے کام کرنے پر زور دیا۔ انہوں نے پولیس افسران کو الرٹ رہ کر ڈیوٹی کرنے کی تاکید کی تاکہ کسی بھی ناگہانی صورتحال سے فوری نمٹا جا سکے۔