مقبوضہ کشمیر میں پاکستانی پرچم ، آرمی چیف کے پوسٹر زلگ گئے

سرینگر(این این آئی) مقبوضہ کشمیر میں ایک بار پھر پاکستانی پرچم اور پاک فوج کے سربراہ جنرل سید عاصم منیر کی تصویر والے پوسٹر چسپاں کیے گئے ہیں اور کشمیریوں کے ساتھ بھر پور اظہار یکجہتی پر پاکستانی عوام کا شکریہ ادا کیا گیا ہے۔ سرینگر اور اسکے ملحقہ علاقوں میں دیواروں، ستونوں اور کھمبوں پر چسپاں پوسٹرز میں پاکستانی پرچم اور پاکستانی فوج کے سربراہ جنرل عاصم منیر کی تصاویر موجود ہیں۔پوسٹروں میں پاک فوج کے سربراہ جنرل سید عاصم منیرکا یہ حالیہ بیان بھی تحریر ہے کہ دنیا کو انصاف کو یقینی بنانا چاہیے اور اقوام متحدہ کی قراردادوں کے مطابق کشمیری عوام سے کیا گیا وعدہ پورا کرنا چاہیے ۔ایک پوسٹر میں لکھا ہے کہ جموں و کشمیر کے لوگ غیر قانونی بھارتی قبضے کے خاتمے اور آزادی کا مطالبہ کرتے ہیں۔ پوسٹروں میں بھارت کیخلاف نعرے بھی درج ہیں ۔