اداروں پرعوام کاکم اعتماد زکوٰۃ پر مبنی فلاحی نظام کے قیام میں رکاوٹ ، قبلہ ایاز

اسلام آباد( نیوز رپورٹر،خصوصی نامہ نگار ) اسلامی نظریاتی کونسل کے چیئر مین ڈاکٹر قبلہ ایاز نے حکومتی اداروں اور اہلیت پر عوام کے اعتماد کی کمی کو پاکستان میں زکوٰۃ پر مبنی فلاحی نظام کے قیام کی راہ میں بڑی رکاوٹ قراردیا ہے اور اس بات پر زور دیا کہ اعتماد پر مبنی بنیادیں پاکستان میں سماجی تحفظ کے مستقبل کی امید ہیں،ضرورت اس بات کی ہے کہ اعتماد پر مبنی سماجی بہبود کی تنظیموں کو فروغ اور مضبوط کیا جائے، جن کو پنپنے کے مواقع بھی فراہم کیے جائیں اورحکومت کو ایسی نجی شعبے کی تنظیموں کے ساتھ شراکت داری شروع کرنی چاہیے۔ اس کے نتیجے میں سماجی تحفظ کا نظام زیادہ موثر ہوگا اور حکومت پر عوام کا اعتماد پیدا ہوگا۔ انہوں نے ان خیالات کا اظہار گزشتہ روز انسٹی ٹیوٹ آف پالیسی اسٹڈیز، اسلام آباد کی طرف سے اسلامی نظریاتی کونسل اور ڈوئچے گیسل شافٹ فر انٹرنیشنل (جی آئیزی) کے تعاون سے تیار کی گئی تحقیق پر مبنی ایک تاریخی رپورٹ ʼاسلامک سوشل فنانس فار سوشل پروٹیکشن ان پاکستان کے اجراء کیلئےمنعقدہ ایک تقریب سے خطاب کرتےہوئے کیا ۔ محمد ارشد نے کہا کہ اداروں کی جانب سے ملکیت، اجتماعی کوشش اور عمل پر مبنی اقدامات کرنے کی خواہش قوموں کی کامیابی کی بنیاد ہے۔ خالد رحمٰن نے اس بات پر زور دیا کہ ملک کو متاثر کرنے والے متعدد عوامل اور مسائل پر توجہ مرکوز کرنے کے لیے ایک جامع سہولت فراہم کرنے والا ماحول پیدا کیا جانا چاہیے۔ڈاکٹر سلمان شیخ نے ایک جامع اسلامی سماجی مالیاتی ماحولیاتی نظام کے قیام کا خاکہ پیش کیا۔ ڈاکٹر عتیق ظفر نے کہا چونکہ زکوٰۃ کی وصولی اور تقسیم ریاست کی ذمہ داری ہے، اس لیے حکومت کو چاہیے کہ وہ سماجی بہبود پر مبنی معاشی مالیاتی نظام وضع کرنے کے لیے ان ممالک کے ماڈلز کو مدنظر رکھے۔