خود کو سیرت پر بات کر نے کے لائق نہیں سمجھتا، جسٹس قاضی فائز عیسیٰ

اسلام آباد (این این آئی)سپریم کورٹ آف پاکستان کے جج جسٹس قاضی فائز عیسیٰ نے کہا ہے کہ میں اپنی کم علمی کی وجہ سے خود کو اس لائق نہیں سمجھتا کہ سیرت پر بات کر سکوں،نبی کریم ﷺکی سب سے بڑی خصوصیت یہ تھی کہ آپ کا اخلاق سب سے بلند تھا۔سیرت چیئر کی افتتاحی تقریب سے خطاب میں سپریم کورٹ کے جسٹس قاضی فائز عیسیٰ نے کہا کہ اس تقریب میں صنفی امتیاز نہ دیکھ کر مجھے خوشی ہوئی، ترکوں نے دنیا پر سب سے زیادہ عرصہ حکومت کی، اس کی وجہ ترکوں کا غیر متعصب رویہ تھا، انہوں نے کسی پر مذہبی جبر مسلط نہیں کیا۔میڈیا کے مطابق انہوں نے کہا کہ نبی کریم ﷺ نے ہمیشہ امن کا راستہ اختیار کیا، صلح حدیبیہ میں امن کا راستہ چنا گیا۔ آپ اور ہم دیکھیں کیا ہم میں یہ اخلاق کی صفت موجود ہے۔جسٹس قاضی فائز عیسیٰ نے کہا کہ میں ایک دو دفعہ اپنی بیگم کے ساتھ گوشت خریدنے گیا، ان مرغیوں کو دیکھ کر میرا تو دل ہی نہیں کرتا کھانے کو۔انہوں نے کہاکہ سفید چینی بنانے کیلئے ہم میٹریل امپورٹ کرتے ہیں، چینی کینسر کی خوراک ہے، برائون شوگر استعمال کرنے کی روایت ڈالنی چاہئے۔