ایٹمی پروگرام محفوظ، دبائو سے پاک ہونیکا بیان انتہائی خوش آئند، شیخ رشید

راولپنڈی (نمائندہ جنگ) سابق وزیر داخلہ شیخ رشید احمد کا کہنا ہے کہ ایٹمی اور میزائل پروگرام مکمل محفوظ اور دبائو سے پاک ہونے کا بیان انتہائی خوش آئندہ ہے کیونکہ قوم جان تو دے سکتی ہے اثاثوں پر سمجھوتہ نہیں کر سکتی، حکومت نے میری ضمانتیں منسوخ کرنے کیلئے اپیل دائر کی ہوئی ہے اگر ضمانتیں منسوخ ہوئیں تو دھوم دھام سے سسرال جائوں گا، کیس بلو رانی کی ٹویٹ ہے جو جیل سے بھی کروں گا، اپنے ٹویٹ میں عوامی مسلم لیگ کے سربراہ کا کہنا تھا کہ دوست ممالک موجودہ حکومت کو سمجھتے ہیں، اسی لئے چھ ارب ڈالر کی یقین دہانی نہیں کرا رہے اور آئی ایم ایف سٹاف لیول معاہدہ نہیں کر رہا،دوسری طرف ہم بجلی، پٹرول اور گیس کے نرخ مسلسل بڑھا رہے ہیں، ان کا کہنا تھا کہ لاہور میں سیاسی ماحول بہت کشیدہ ہے جس سے پورا صوبہ متاثر ہے، چوروں اور چوکیداروں میں کبھی صلح نہیں ہو سکتی، 90دن میں الیکشن آئین کا سب کو حکم ہے۔