سپریم کورٹ ،نایاب عمرانی کو ملنے والی جائیداد کی حدتک حکم امتناع برقرار

اسلام آباد(جنگ رپورٹر) عدالت عظمیٰ نےʼʼ بلوچستان میں جائیداد کے تنازعہ پر قتل ہونے والے بھائی وقار عمرانی کے مقدمہ کی پیروی کرنے کی پاداش میں جیکب آباد (سندھ) میں قتل ہونے والی خاتون وکیل صنم عمرانی،ان کی والدہ اور بھابھی کے قتل کے بعد زندہ بچ جانے والی نایاب سکندر عمرانی کی درخواست پر لئے گئے از خود نوٹس کیسʼʼ کی سماعت کے دوران نایاب عمرانی کوملنے والی جائیداد کی حد تک حکم امتناع برقرار رکھتے ہوئے دیگر فریقین کو اپنے حقوق کیلئے سِول کورٹ سے رجوع کرنے کا مشورہ دیا ہے جبکہ چیف جسٹس ،عمر عطاء بندیال نے ریمارکس دیئے ہیں کہ نایاب عمرانی ایک بچی ہے جس کے حقوق پامال ہوئے ہیں،اب جو حقوق اسے ملے ہیں ہم انہیں مزید پامال نہیں ہونے دینگے،ہم نہیں چاہتے کہ اس کو جو کچھ ملا وہ پھر سے کوئی اس سے چھیننے کی کوشش کرے؟ سپریم کورٹ انفرادی معاملے پر ازخودنوٹس نہیں لیتی ہے لیکن عدالت نے نایاب کے حالات دیکھ کر یہ ازخودنوٹس لیا تھا،اس کے سارے اہل خانہ کوہی قتل کردیا گیا تھا،اب اسکو جو حقوق حاصل ہوئے ہیں وہ کسی کو نہیں چھیننے دینگے،مقدمہ کی سماعت چیف جسٹس عمر عطاء بندیال کی سربراہی میں قائم تین رکنی بنچ نے کی ، دوران سماعت فاضل وکیل نے کہا کہ نایاب کو بڑی مشکل سے کچھ حصہ ملا ہے ،اب اس سے یہ بھی نہ چھن جائے،انہوں نے عدالت سے اس کے حصے کے تحفظ کو یقینی بنانے کی استدعا کی تو چیف جسٹس نے کہا کہ ہم اس کو ملنے والے حصے کی حد تکʼʼ سٹیٹس کوʼʼ حکم امتناع ʼʼبرقرار رکھتے ہیں،جو کچھ نایاب کو ملاہے وہ واپس نہیں لیا جائے گا۔