اسلامی ممالک کے وائس چانسلرز کا 5واں فورم کل سے اسلام آباد میں شروع ہوگا

اسلام آباد (اپنے نامہ نگار سے) اسلامی ممالک کا 5واں وائس چانسلرز فورم کل سے اسلام آباد میں شروع ہوگا۔ ہائر ایجوکیشن کمیشن آف پاکستان، کامسیٹس یونیورسٹی، برٹش کونسل پاکستان، اسلامک ورلڈ ایجوکیشنل، سائنسی اور ثقافتی تنظیم اور وزارت تعلیم وپیشہ ٹریننگ کی پارٹنرشپ میں مشترکہ طور پر اس فورم کا انعقاد کررہے ہیں۔ اسلامی دُنیا کی یونیورسٹیوں /اعلیٰ تعلیمی اداروں کے 250وائس چانسلرز، ریکٹرز اور صدور کے مابین 20 او آئی سی کی یونیورسٹیوں کے 40سربراہان اور مقامی یونیورسٹیوں کے200وائس چانسلرز وی سی فورم میں شریک ہوں گے۔ ان ممالک میں آذربائیجان، بینن، چاڈ، ایران، کرغیزستان، لیبیا، ملائشیاء، مالدیپ، نگاڑ، نائیجیریا، فلسطین، سیرالیون، سوڈان، الترکیہ، متحدہ عرب امارات، یوگینڈا اور یمن شامل ہیں۔ وی سی فورم میں نمایاں مقررین میں ڈاکٹر سلیم محمد المالک ڈائریکٹر جنرل آئی سی ای ایس سی او اور الترکیہ کونسل آف ہائر ایجوکیشن کے صدر کے مشیر مصطفیٰ ترکر ایری ہوں گے۔ وی سی فورم ایک پلیٹ فارم فراہم کرے گا جس میں اسلامی دُنیا میں اعلی ٰتعلیم کے مستقبل کے سلسلے میں اپنے تجربات کی شیئرنگ،نیٹ ورکنگ،وسائل کا مشترکہ استعمال،تعاون کا فروغ،اور ڈائیلاگ کی حوصلہ افرائی ہوسکے گی۔