لیجنڈز لیگ ، ورلڈ جائنٹس نے شاہد آفریدی کی ایشیا لائنز کو 20 رنز سے شکست دیدی

لاہور (نیوزرپورٹر) قطر میں جاری لیجنڈز لیگ کے چھٹے میچ میں ورلڈ جائنٹس نے شاہد آفریدی کی ایشیا لائنز کو 20 رنز سے شکست دیدی۔دوحہ کرکٹ گراؤنڈ میں کھیلے گئے میچ میں ورلڈ جائنٹس نے پہلے بیٹنگ کرتے ہوئے مقررہ 20 اوورز میں 3 وکٹوں کے نقصان پر 150 رنز بنائے، ہاشم آملہ 68 رنز بناکر ٹاپ سکورر رہے۔دیگر کھلاڑیوں میں جیک کیلیس 56، کرس گیل 2 جبکہ کپتان شین واٹسن 6 رنز بناکر آؤٹ ہوئے، ایشیا لائنز کی جانب سے محمد عامر اور سہیل تنویر نے ایک ایک وکٹ حاصل کی۔ہدف کے تعاقب میں ایشیا لائنز کا آغاز اچھا نہ رہا، اوپل تھرنگا 4 رنز بناکر پویلین لوٹ گئے، تھیسارا پریرا 12، محمد حفیظ 13، مصباح الحق 5، عبدالزاق 9 رنز بنا سکے جبکہ کپتان شاہد آفریدی 26 اور دلشان 37 رنز بنا کر نمایاں رہے۔ایشیا لائنز کی ٹیم مقررہ 20 اوورز میں محض 130 رنز بنانے میں کامیاب ہوئی ۔