کاہنہ پولیس مقابلہ میں2ڈکیت ہلاک،رائیونڈمیں شہری نے ڈاکوماردیا

لاہور،کاہنہ(نامہ نگار،کر ائم رپو رٹرسے) کاہنہ میں پولیس مقابلہ،لوٹ مار کرکے فرار ہوتے دونوں ڈاکو ہلاک ہوگئے جبکہ رائیونڈ میں شہری نے فائرنگ کرکے ڈاکوماردیا۔ گزشتہ روز2ڈاکوئوں نے اللہ ہو پل انڈسٹریل اسٹیٹ کےقریب شہری سے موٹرسائیکل چھینی ،جسکی 15کال پر پولیس ڈاکوئوں کے تعاقب میں لگ گئی، ملزمان نےریحان گارڈن سکیم کے قریب پٹرول ایجنسی سے پٹرول ڈلوایا اور رقم بھی چھینی تو تعاقب کرتی پولیس موقع پر پہنچ گئی، ڈاکوؤں نے قریب نجی سکول میں پناہ لےلی اورفائرنگ شروع کردی، ایس ایچ او کاہنہ انسپکٹر محمد رضا نے اپنی ٹیم کے ہمراہ سکول کوگھیر ے میں لے کرجوابی فائرنگ کی،تاحال ہلاک ڈاکوؤں کی شناخت نہ ہوسکی ۔پولیس مقابلہ کی سی سی ٹی وی فوٹیج بھی منظر عام پر آگئی ہے۔ادھررائیونڈ سٹی کے علاقہ جلال پورہ میں 4 افراد نےگن پوائنٹ پر ٹریکٹر ٹرالی چھین لی ،اسی دوران ڈرائیور نے ڈاکو سے پسٹل چھین کر فائرنگ کر دی، نتیجے میں ایک ڈاکومارا گیا،ساتھی فرارہوگئے ۔پولیس کا کہنا ہے کہ ہلاک ڈاکو کی شناخت ریاست علی کے نام سے ہوئی اور ننکانہ کا رہائشی تھا، ڈکیتی کے مقدمہ میں ریکارڈ یافتہ ہے۔