ٹرائیکا نے معیشت، سیاست، معاشرت سب کا بیڑہ غرق کر دیا، سراج الحق

لاہور (نیوزرپورٹر)امیر جماعت اسلامی سراج الحق نے کہا ہے کہ ٹرائیکا نے معیشت، سیاست، معاشرت سب کا بیڑہ غرق کر دیا،حکومتی رٹ ختم ہو چکی، ایک سیاسی لیڈر کے عدالت میں پیش ہونے پر پوری موٹروے اور وفاقی دارالحکومت کو سیل کر دیا گیا۔ امیرجماعت نے مطالبہ کیا کہ حکومت رمضان کے تقدس میں مہنگائی میں 50فیصد کمی کرے۔انہوں نے مزید کہا کہ عوام کو شفاف طریقے سے اپنے نمائندے منتخب کرنے کا اختیار دیا جائے، ملک میں ایک روز قومی انتخابات وقت کی ضرورت اور بحرانوں کے حل کا واحد راستہ ہیں۔ صوابی میں جلسہ عام سے خطاب کرتے ہوئے انہوں نے کہا کہ قومی سیاست پر 75برسوں سے جرنیلوں کا قبضہ ہے۔ پی ڈی ایم، پیپلزپارٹی کی حکومت بھی وہی لوگ لائے جنھوں نے پی ٹی آئی کو مسلط کیا، گزشتہ پانچ برسوں میں 15سیاسی جماعتوں کی کارکردگی سب کے سامنے ہے۔جلسہ میں مختلف سیاسی جماعتوں سے سیکڑوں افراد نے جماعت اسلامی میں شمولیت بھی اختیار کی۔