ہفتوں سے مذاکرات کے باوجود پی سی بی کا آرتھر کیساتھ معاہدہ نہیں ہوسکا

کراچی (نمائندہ خصوصی) کئی ہفتوں کے مذاکرات کے باوجود پی سی بی مکی آرتھر کے معاہدے کو حتمی شکل نہیں دے سکا ہے اور غیر یقینی کی صورتحال برقرار ہے۔ پاکستان کرکٹ بورڈ پاکستانی ٹیم کے نئے ہیڈ کوچ مکی آرتھر کے ساتھ معاہدہ کرنے سے پہلے بہت سارے سوالوں کے جواب چاہتا ہے۔ کئی سوالات کا جواب نہیں ملا ہے اس لئے معاہدہ تاخیر کا شکار ہے۔ پی سی بی چیئرمین نجم سیٹھی نے پریس کانفرنس میں کہا کہ میڈیا کی طرح ہم بھی مکی آرتھر سے پوچھ رہے ہیں کہ وہ انگلینڈ میں بیٹھ کس طرح ٹیم چلائیں گے۔ اسی لیے معاہدے میں دیر ہو رہی ہے ۔ مکی کو بتایا جا رہا کہ سوال اٹھ رہے ہیں کہ آپ کتنا وقت پاکستانی ٹیم کو دیں گے اور کس طرح سسٹم چلائیں گے۔ معاملہ فائنل مرحلے میں ہے ۔