پاکستان کے سیاسی حالات انتہائی نازک اور تشویشناک ہیں، حناجیلانی

سوات(نمائندہ جنگ) ہیومن رائٹس کمیشن آف پاکستان کی چیئرپرسن حنا جیلانی نے کہاہے کہ پاکستان کی موجودہ سیاسی حالات انتہائی نازک اور تشویشناک ہے، عام آدمی شدید مشکلات کا شکار ہے ادارے اپنا کردار ادا نہیں کر رہے ہیں،ان خیالات کا اظہارانہوں نے پروفیسر اعجاز خان، سینئروکیل شیر محمدخان، جمیلہ گیلانی، اکبرخان اور مریم روف کے ہمراہ سوات پریس کلب میں میٹ دی پریس سے خطاب کرتے ہوئے کیا۔ انہوں نے کہاکہ ادارے اتنے کمزور ہوچکے ہیں کہ ہر کوئی ان کو چیلنج کرتاہے۔ سیاسی حالات کو بہتر بنانا سول اداروں کا کام ہے،تمام ادارے اگر آئین کے مطابق اپنا کردار ادا کریں گے توہی ملک کے حالات بہتر ہوسکتے ہیں۔ انہوں نے کہا کہ پاکستان کی معیشت تباہی کی طرف جاری ہی ہے، لوگ بھوک وافلا س کا شکار ہیں مگر سیاستدان اپنی خواہشات کے لئے بغیر کسی معقول وجہ کے اسمبلیاں توڑ دیتے ہیں صرف پنجاب میں انتخابات کے لئے 35 ارب روپے درکار ہیں جو عوام کی فلاح پر لگاکر حالات بہتر کئے جا سکتے ہیں، انہوں نے کہا کہ ملک میں دو صوبوں میں اسمبلیاں نہیں ہیں، قومی اسمبلی نامکمل ہے۔ انہوں نے سوات کے عوام کو خراج تحسین پیش کیا جنہوں نے دوبارہ دہشت گردی او بد امنی کو مسترد کردیا اور سڑکوں پر نکل آئے۔