زمان پارک میں پولیس کے پاس سرچ وارنٹ تھا توکیا کسی کو دکھایا؟ اعتزازاحسن

لاہور(کورٹ رپورٹر)رہنما پیپلزپارٹی بیرسٹر اعتزاز احسن نے کہا ہے کہ زمان پارک آپریشن میں اگر پولیس کے پاس سرچ وارنٹ تھا توکیا اس نے کسی کو دکھایا؟رہائشی علاقے میں آنسو گیس کا بے دریغ استعمال کیا گیا، پولیس کے شیل میرے گھر میں بھی گرے، کرین سے گیٹ توڑے گئے، کارکن کوئی منفی کام نہ کریں، اسکا قانونی طور پر جواب دیں، پی ٹی آئی کے کارکن پرامن رہیں، پی ٹی آئی کو عدالت میں جانا چاہئے۔ لاہور میں میڈیا سے گفتگو کرتے ہوئےانکا کہنا تھا کہ کبھی برصغیر کی تاریخ میں 4ایس پیز بکتر بند گاڑیاں لیکر سرچ آپریشن کیلئے گئے،کوئی خاتون پولیس افسر نہیں تھی،یہاں کیا کوئی ڈکیت رہتے تھے، یہ پرامن لوگوں کا علاقہ ہے، چیف جسٹس کو نوٹس لینا چاہئے، ایک سیاسی جماعت کے خلاف اس طرز کا آپریشن نہیں ہونا چاہئے، سیاست میں کسی کو ختم نہیں کیا جا سکتا۔ ذوالفقار بھٹو اور بینظیر بھٹو کو ختم کرنے کے بعد بھی پیپلز پارٹی ختم نہیں ہو سکی۔