سماعت سے پہلے جج ملزم سے پوچھے ’’بتاتیری رضا کیا ہے ‘‘حافظ حمد اللہ

اسلام آباد(صباح نیوز) پاکستان ڈیموکریٹک موومنٹ(پی ڈی ایم)کے ترجمان حافظ حمد اللہ نے کہا ہے کہ سماعت سے پہلے جج ملزم سے پوچھے ’’بتاتیری رضا کیا ہے ‘‘،سماجی رابطے کی ویب سائٹ پر موجودہ صورتحال کے حوالے سے جاری کیے گئے بیان میں حافظ حمد اللہ نے کہا کہ چند منٹ میں آٹھ ضمانتیں دینا دنیا کا تیز ترین انصاف ہے، مبارک ہو پاکستانیو۔انہوں نے کہا کہ عدالتی تاریخ میں عمران خان کے لیے ضمانتوں کا اتوار بازار لگایا گیا ہے۔حافظ حمد اللہ کا کہنا ہے کہ اب زخمی ہونے والے پولیس کو حکم دینا باقی ہے کہ وہ زمان پارک جا کر عمران خان سے معافی مانگیں۔پی ڈی ایم کے ترجمان نے یہ بھی کہا کہ عدالت، ریاست، قانون اور ریاستی فورس سے لڑنا عمران خان کے مطابق جہاد ہے۔