ریونیو سے متعلقہ معاملات ترجیحی بنیادوں پر حل کئے جائیں، کمشنر

راولپنڈی (نمائندہ جنگ) کمشنر راولپنڈی ڈویژن لیاقت علی چٹھہ نے دفتر ڈپٹی کمشنر راولپنڈی کا دورہ کیا جہاں انہیں ریونیو ٹارگٹ، ترقیاتی سکیموں، پرائس کنٹرول، کھاد اور آٹے کی فراہمی، پتنگ بازی اور مردم شماری سمیت دیگر امور پر بریفنگ دی گئی۔ ڈپٹی کمشنر راولپنڈی حسن وقار چیمہ، ایڈیشنل ڈپٹی کمشنر ریونیو مری کیپٹن (ر) قاسم اعجاز، ضلع کی تمام تحصیلوں کے اسسٹنٹ کمشنرز سمیت مختلف محکموں کے افسران بھی موجود تھے۔ کمشنر راولپنڈی نے کہا کہ گرداوری، جمع بندی اور بلاک کھیوٹ کے مسئلے سمیت تمام ریونیو معاملات ترجیحی بنیادوں پر حل کئے جائیں، ریونیو کے معاملات اور اہداف میں کوتاہی کرنے والے افسران اور اہلکاروں کے خلاف سخت ایکشن لیا جائے گا۔انہوں نے کہا کہ تمام اسسٹنٹ کمشنرز نظام کو مزید بہتر بنانے میں اپنا کردار ادا کریں ۔ اسسٹنٹ کمشنرز نمبرداروں کا وٹس ایپ گروپ بنائیں تاکہ ریونیو معاملات میں علاقائی لوگوں کو آگاہی مل سکے۔ انہوں نے کہا کہ نائب تحصلیدار قلمی کی بجائے ٹائپ فیصلہ لکھیں اور ریونیو کیسز کا فیصلہ جلد از جلد ہونا چاہئے۔اس موقع پر کمشنر کو بریفنگ میں بتایا گیا کہ ایک لاکھ روزانہ کے حساب سے مجموعی طور پر 7551447 آٹے کے تھیلے مستحق افراد کو مفت دیئے جائیں گے۔ اس حوالے سے ضلع بھر میں 232 ٹرکنگ آٹا پوائنٹس بنائے گئے ہیں۔کمشنر راولپنڈی نے کہا کہ پتنگ فروشوں اور پتنگ بازوں کے خلاف سخت کاروائی جاری رکھی جائے، میرج ایکٹ پر ہر صورت عمل در آمد کرایا جائے اور خلاف ورزی کرنے والے میرج ہال کو سر بمہر کر کے جرمانے کئے جائیں۔انہوں نے کہا کہ ضلع میں جاری مردم شماری کے عملے کو مکمل سیکورٹی فراہم کی جائے، پرائس کنٹرول کے حوالے سے انجمن تاجران کے نمائندوں سے مل کر پرائس لسٹیں آویزاں کی جائیں اور جی ٹی روڈ کو خوبصورت بنانے کے لیے تمام متعلقہ افسران اپنا عملی کردار ادا کریں۔ انہوں نے محکمہ صحت کے حکام کو ہدایت دیتے ہوئے کہا کہ بنیادی مراکز صحت میں عوام کو ضروری تمام سہولیات دی جائیں ان مراکز کو تمام طبی سہولیات سے آراستہ کیا جائے۔ انہوں نے کہا کہ کالجز میں 16000 پودے لگانے کے عمل کو یقینی بنایا جائیگا ۔تمام سکولوں میں تزین و آرائش کے کام کو تیز کیا جائے اور بچوں کی تعلیم پر خصوصی توجہ دی جائے ان کا کہنا تھا کہ مری روڈ کو ماڈل روڈ بنایا جائیگا آج 19مارچ سے جشن بہاراں منایا جائیگا جس میں علاقائی کھیلوں کو شامل کیا جائے گا۔ ڈینگی اور پولیو مہم پر کمشنر راولپنڈی نے اطمینان کا اظہار کیا۔