مفت آٹا سکیم ، ضلع چکوال میں 48 یوٹیلٹی سٹورز اور 29 ٹرکنگ پوائنٹس مقرر

چکوال(نمائندہ جنگ) ڈپٹی کمشنر قراةالعین ملک نے کہا ہے کہ حکومت پنجاب کے رمضان پیکج کے تحت ضلع میں مفت آٹا سکیم کے لئے 48 یوٹیلٹی سٹورز اور 29 ٹرکنگ پوائنٹس مقرر کئے گئے ہیں جن پر ساٹھ ہزار روپے سے کم ماہانہ آمدنی والے افراد کو رمضان المبارک کے دوران مفت آٹا دیا جائے گا۔ ڈپٹی کمشنر نے حکومت پنجاب کے وضع کردہ طریق کار کی وضاحت کرتے ہوئے کہا کہ رمضان پیکج کے توسط سے مفت آٹا حاصل کرنے کے لئے ضروری ہے کہ اپنے موبائل سے Atta سپیس قومی شناختی کارڈ نمبر# لکھ کر 8070 پر میسج کریں اور اگر نام فہرست میں شامل ہونے کا تصدیقی میسج آ جائے تو وہ فرد مفت آٹا حاصل کر سکتا ہے۔ ڈپٹی کمشنر نے کہا کہ عوام مفت آٹا سکیم کی تقسیم کے عمل کو کامیاب بنانے میں حکومت کے ساتھ مکمل تعاون کریں۔ انہوں نے عوام سے اپیل کی کہ مذکورہ مراکز پر صبر و تحمل کا مظاہرہ کرتے ہوئے تشریف لائیں اور کسی قسم کے لڑائی جھگڑا سے پرہیز کریں۔ رمضان کے ماہ مبارک کے احترام اور تقدس کا خاص خیال رکھیں۔ ہر پوائنٹ پر آپ کے بیٹھنے کیلئے باقاعدہ کرسیاں لگی ہوں گی جہاں پر آپ آرام سے بیٹھ کر اپنی باری کا انتظار کر سکتے ہیں ۔