کوئٹہ میں دہشت گردی کا منصوبہ ناکام ،2 دہشتگرد گرفتار

کوئٹہ(اسٹاف رپورٹر) پولیس نے کوئٹہ میں دہشت گردی کا منصوبہ ناکام بناتے ہوئے کالعدم تنظیم کے دو دہشت گردوں کو گرفتار کرکے دستی بم اور اسلحہ قبضے میں لے لیا جبکہ ایک فرار ہونے میں کامیاب ہوگیا۔ گرفتار دہشتگرد ایف سی، پولیس اور سرکاری دفاتر پر دستی بم حملوں سمیت دیگر سنگین جرائم میں ملوث ہے۔ سہولت کاروں کی گرفتاری کے لئے ٹیمیں چھاپے مار رہی ہیں۔ پولیس ذرائع کے مطابق ہزارگنجی میں پولیس ناکے پر ایک موٹرسائیکل پر سوار تین مشکوک افراد کو رکنے کا اشارہ کیا تاہم موٹرسائیکل سوار فائرنگ کرتے ہوئے فرار ہوگئے۔ پولیس اور ایگل اسکواڈ نے تعاقب کیا اور قریب ہی میدانی علاقے میں دو دہشت گردوں کو گرفتار کرکے ان کے قبضے سے چار دستی بم اور اسلحہ قبضے میں لے لیا۔ دہشتگرد جمعہ خان اور روزمحمد کو نامعلوم مقام پر منتقل کردیا گیا۔ پولیس ذرائع نے بتایا کہ ابتدائی تفتیش میں گرفتار دہشتگردوں نے 30 جنوری کو شالکوٹ کے علاقے میں ایف سی چیک پوسٹ پر دستی بم حملہ، 5 فروری کو سمگلی روڈ محکمہ آبپاشی کے دفتر پر دستی بم پھینکنے، 14 فروری کو شالکوٹ تھانے پر دستی بم حملہ کرنے جبکہ 4 دسمبر 2022 میں نیو سریاب تھانے پر دستی بم حملہ کرنے کا اعتراف کرتے ہوئے اپنے سہولت کاروں اور دیگر ساتھیوں کی نشاندہی کی ہے۔ جن کی گرفتاری کے لئے ٹیمیں چھابے مار رہی ہیں پولیس ذرائع کے مطابق گرفتار دہشت گردوں کو مزید تفتیش کے لئے سی ٹی ڈی کے حوالے کردیا ہے ۔۔انسپکٹر جنرل پولیس بلوچستان عبدالخالق شیخ نے کو ئٹہ میں دہشت گردی کا منصوبہ ناکام بنانے پر پولیس ٹیم کی کارکردگی کو سراہتے ہوئے پولیس ٹیم کو نقد انعام اور اسناد دینے کا اعلان کیا ہے۔