زمان پارک میں پولیس آپریشن پر علاقہ مکینوں کا اظہار تشکر

کراچی (ٹی وی رپورٹ) زمان پارک میں پولیس آپریشن پر علاقہ مکینوں نے اظہار تشکر کیا ہے ،زمان پارک کے اطراف رہائشی خواتین کا کہنا ہے کہ پولیس کا شکریہ جس نے حوصلے سے کام کیا اور ہمیں نجات دلائی ۔ ایک رہائشی خاتون کا کہنا تھا کہ پولیس کا بہت شکریہ کہ اس نے اتنے حوصلے سے کام کیا اور ہمیں نجات دلائی ہے ،خاتون کا کہنا ہے کہ اکثر ہم نے ایسے لوگ دیکھے جو مشکوک سے ہوتے تھے یہ لوگ ہمارے ایریا اور لاہور سے نہیں تھے کہیں باہر سے آئے ہوئے لگتے تھے،خاتون کا کہنا تھا کہ میں اسکول ٹیچر ہوں لیکن پڑھانے نہیں جاپارہی ہوں ، اکتوبر کے آخری ہفتے سے ہم اس پریشانی میں مبتلا ہیں ، ضلعی انتظامیہ کے اس آپریشن سے ہم بہت خوش ہیں خاص کر آئی جی پنجاب سے ہم بہت خوش ہیں۔خاتون کا کہنا ہے کہ اکثر ہم نے ایسے لوگ دیکھے جو مشکوک سے ہوتے تھے یہ لوگ ہمارے ایریا اور لاہور سے نہیں تھے کہیں باہر سے آئے ہوئے لگتے تھے ۔ ایک اور خاتون کا کہنا تھا کہ ہم تو بہت تنگ آئے ہوئے ہیں نہ گھر سے نکل سکتے ہیں نہ کہیں آنا جانا سب کچھ بند ہوکر رہ گیا ہے ۔ اب ہمیں سکون محسوس ہورہا ہے ، یہاں جو لوگ پھر رہے تھے ان سے ہم بہت پریشان تھے اب آج سکون آیا ہے ۔ بہت اچھا کام کیا ہے آج پولیس والوں نے ۔ پولیس والوں کو شاباش کے انہوں نے اپنی جانوں کی پرواہ کئے بغیر یہ آپریشن کیا ۔ خاتون کا کہنا تھاکہ یہاں پھرنے والے لوگ مجھے تو طالبان سے لگتے تھے ۔