انتشار کی سیاست سے ملک کی جگ ہنسائی ہورہی ہے‘ضیاء لانگو

کوئٹہ(خ ن)صوبائی وزیر داخلہ میر ضیاء اللہ لانگو نے کہا ہے پاکستان کو معیشت، سیاست اور امن و امان جیسے چیلنجز کا سامنا ہے اس وقت چاروں صوبے دہشت گردی کا شکار ہے اور دہشت گردی کا مقابلہ کرنے کے لیے ہم سب کو ایک پیج پر ہونا چاہیے سابق وزیراعظم عمران خان کی گرفتاری کے حوالے سے ملک میں انتشار کی سیاست پھیل رہی ہے جس سے ہر صورت ملک کو نقصان ہو رہاہے وزیر داخلہ نے کہا کہ سابق وزیراعظم کوانتشار کی سیاست ختم کرکےعدالتوں کا سامنا کرنا چاہیے دنیا میں بڑے لیڈروں جیسے ذوالفقارعلی بھٹو، نیلسن منڈیلا نے جیل کاٹی ہے جبکہ سابق وزیراعظم ہونے کے ناطے عمران خان کو چاہیے کہ وہ قانون کا احترام کریں اور سیاستدانوں پرکیسز ہوتے ہیں جن کا انہیں سامنا کرنا چاہیے اور اپنے ادارے پر یقین رکھیں وزیر داخلہ نے کہا کہ عمران خان اور ان کے سپوٹرز سے اپیل کرتے ہیں کہ وہ دشمن کے ایجنڈے پر کام نہ کریں اور اپنے اداروں اور اپنے لوگوں کے خلاف نہ اٹھ کھڑے ہو جس سے دنیا میں پاکستان کی جگ ہنسائی ہورہی ہے۔