بھارتی پنجاب میں حالا ت بدتر، سکھ رہنما امرت پال کیخلاف کریک ڈائون جاری

امرتسر (اے پی پی)بھارت میں سکھ اکثریتی ریاست پنجاب اور ہریانہ میں حالات بد سے بدتر ہوتے جا رہے ہیں جہاں خالصتان کے حامی ممتازسکھ رہنما امرت پال سنگھ کے خلاف کریک ڈائون تیسرےروز میں داخل ہو گیا اور ان کے 100سے زائد حامیوں کو گرفتار کر لیاگیاہے نیز حکام نے ریاست پنجاب میں موبائل انٹرنیٹ سروس معطل کر دی ہے۔کشمیر میڈیا سروس کے مطابق30سالہ امرت پال سنگھ حالیہ مہینوں میں ایک علیحدہ وطنʼʼ خالصتانʼʼ کے قیام کا مطالبہ کرنے والے اور تقریبا 3 کروڑ افراد کی ریاست کے دیہی علاقوں میں ریلیوں میں سکھ مذہب کی اپنی تشریح کرنے والے رہنما کے طورپر سامنے آئے ۔ گزشتہ ما ہ ان کے ایک ساتھی کو مبینہ حملے اور اغوا کی کوشش کے الزام میں گرفتار کیا گیاتو تلواروں، خنجروں اور بندوقوں سے لیس امرت پال سنگھ اور ان کے حامیوں نے ایک پولیس سٹیشن پر چھاپہ مارا ۔سکھوں کی مقدس ترین عبادت گاہ گولڈن ٹیمپل کے شہر امرتسر کے مضافات میں دن دہاڑے چھاپے کے دوران کئی پولیس اہلکار زخمی ہوگئے اور حکام پرامرت پال سنگھ کے خلاف کارروائی کے لیے دبائو بڑھ گیا۔بھارتی ذرائع ابلاغ کی خبرو ں کے مطابق پنجاب پولیس نے بتایاکہ اس نے ریاست میں امن و امان کو خراب کرنے کی کوشش کرنے والے افراد کو گرفتار کرلیا،جن میں امرت سنگھ کے چچا اور ڈرائیور بھی شامل ہیں۔پولیس نے بتایاکہ مزید 34 افراد کوگرفتارکیاگیااور اب تک مجموعی طورپر112افراد کو گرفتار کیا گیا ہے ۔ مقامی ذرائع ابلاغ کا کہنا ہے کہ پیر کو پنجاب خاص طور پر دیہی علاقوں اور امرت پال سنگھ کے گائوں جلو پور کھیرا کے اردگرد پولیس کی بھاری نفری تعینات کی گئی ہے۔مقامی میڈیا رپورٹس کے مطابق پنجاب بھر میں موبائل انٹرنیٹ اور ایس ایم ایس سروسز پر پابندی کو میں توسیع کر دی گئی ہے جبکہ ہمسایہ ریاست ہریانہ میں بھی ہائی الرٹ جاری کیاگیاہے