موٹر سائیکل والوں کیلئےپیٹرول پر 100 روپے سبسڈی دی جائے گی، مصدق ملک

اسلام آباد،لاہور(خصوصی نامہ نگار،نمائندہ جنگ)وزیر مملکت برائے پٹرولیم ڈاکٹر مصدق ملک نے کہا ہے کہ عوام کو ریلیف دینا حکومت کی ترجیحات میں شامل ہے،وزیر اعظم شہباز شریف کی ہدایت پر سستا پٹرول سکیم کے تحت موٹر سائیکل والوں کیلئے پٹرول پر پچاس روپے کی بجائے سو روپے کی سبسڈی دی جائے گی اور چھ ہفتوں کے دوران اس سکیم کو نافذ العمل کر دیا جائے گا،فیصلہ کر لیا گیا ہے بڑی گاڑی والوں کو پٹرول کی زیادہ قیمت ادا کرنا ہوگی ۔موٹر سائیکل مالکان کو 21 لٹر تک ماہانہ سبسڈی دی جائے گی، یومیہ دو سے تین لٹر دیا جائے گا،800 سی سی سے کم گاڑی پر 30 لٹر اور اس سے اوپر کے مالکان کو ماہانہ ایک ٹینک بھروانے کی اجازت ہوگی،گزشتہ روزپریس کانفرنس سے خطاب اورجیونیوزسے گفتگو کرتےہوئےمصدق ملک نے کہا کہ ہم نے وزیر اعظم کی ہدایت پر سستا پٹرول فراہم کرنے کی سکیم پر کام کر نا شرو ع کر دیا ہے اس پر ابتدائی طور پر یہ فیصلہ کیا گیا کہ پٹرول کے ٹیرف میں غریب کو پچاس روپے سبسڈی دی جائے گی مگر اب وزیر اعظم نے ہمیں دوبارہ ہدایت کی ہے کہ سبسڈی کو بڑھا کر سو روپے کر دیا جائے۔ سکیم کے تحت پٹرولم کی قیمت میں کمی لانے کیلئے کام جاری ہے ، ہم نے ایسا میکنزم بنا لیا ہے کہ مال دار طبقے پر ٹیکس لگائیں گے اور غریب کو بھر پور ریلیف دیا جائے گا۔حکومت رمضان المبارک میں عوام کو بھرپور ریلیف فراہم کر ے گی جس کی بہترین مثال مفت آٹے کی فراہمی ہے۔انہوں نے کہا کہ غریب کو سستی گیس فراہم کرنا بھی ہماری ترجیحات میں شامل تھا جس کے تحت یکم جنوری سے ہم نے گیس کے ٹیرف پر عملدرآمد شروع کر دیا گیا ہے اور گیس کا سرکلر ڈبٹ ختم کر دیا گیا ہے۔ بجلی کے حوالے سے بھی ہم نے پہلے ہی پالیسی بنا رکھی ہے ،100 یا 200یونٹ استعمال کرنے والوں کو سستی بجلی دی جائے گی جبکہ اس سے زیادہ استعمال کر نے والوں کو پورا بل ادا کر نا ہوگا، ہم نے بجلی کی قیمتوں کے حوالے سے یکساں قانون بنایاہے اب کسی سیٹھ کو سستی بجلی فراہم نہیں کی جائے گی۔ پاکستان اس وقت مشکل حالات سے گزر رہا ہے اور ہم پر امید ہیں کہ ملک جلد بہتری کی طرف گامزن ہوگا۔انہوں نے کہا کہ عوام کو ریلیف فراہم کرنے کیلئے ایران سمیت تمام ممالک سے پٹرول اور دیگر اشیائے ضرور یہ خریدنے کیلئے تیار ہیں تاہم اس حوالے سے اس بات کو ملحوظ خاطر رکھا جائے گا کہ ہم پر بین الاقوامی پابندیاں عائد نہ ہو جائیں۔مصدق ملک نے کہا کہ 800سی سی یا اس سے کم والی گاڑی کو پٹرول پر30 لیٹر ماہانہ تک سبسڈی دی جائے گی اور ایک وقت میں گاڑی میں 5 سے 7 لیٹر پٹرول ڈالا جائے گا۔سبسڈائز پٹرول کیلئے گاڑی چلانے والے کے نام پر ہونی چاہئے، اس پالیسی سے گاڑی اپنے نام پر کرانے میں بھی اضافہ ہوگا، ہم چاہتے ہیں لوگ بڑی گاڑیاں چھوڑ کر چھوٹی گاڑیوں پر آئے اس سے پٹرول کی بھی بچت ہوگی، سکیم کے اہل افراد کو ان کے موبائل پر میسج موصول ہو گا اور وہ اس میسج کو پٹرول پمپ پر دکھا کر پٹرول وصول کر سکے گا۔ہم پٹرول پمپس والوں کو ایک ڈیوائس فراہم کی جائے گی جس پر سبسڈی حاصل کرنے والے کا ریکارڈ موجود ہو گا۔ مصدق ملک نے کہا کہ عمران خان کی اصلیت عوام کے سامنے کھل کر آچکی ہے وہ کسی قانون کو نہیں مانتے اور خود کو قانون سے بالاتر سمجھتے ہیں۔ عمران خان ریاست کو کھلے عام چیلنج کر رہا ہے کہ مجھے پکڑ کر دکھائو ۔عمران خان کے غلط اقدمات کی وجہ سے دو پاکستان بن چکے ہیں ،غریب کا پاکستان الگ ہے اور امیر کا پاکستان الگ،اس موقع پر انہوں نے سابق چیف جسٹس ثاقب نثار کی مبینہ آڈیو لیک ہونے کا حوالہ دیتے ہوئے کہا کہ اس پر وزارت داخلہ مکمل تحقیقات کرے۔ توشہ خانہ کے حوالے سے حکومت نے واضح قانون بنا لیا ہے جو بھی تحفہ وصول کرے گا وہ پوری قیمت ادا کر ے گا اور ہمارے پاس جو توشہ خانے کا ریکار ڈ موجود تھا وہ عوام کے سامنے رکھ دیا گیا ہے۔