عمران قانون شکنی کے راستے پر چلیں گے تو ریاست کو نمٹنا آتا ہے،احسن اقبال

کراچی (ٹی وی رپورٹ) جیوکے پروگرام ”آج شاہزیب خانزادہ کیساتھ“ میں گفتگو کرتے ہوئے ن لیگ کے رہنما اور وفاقی وزیر منصوبہ بندی احسن اقبال نے کہا ہے کہ عمران خان قانون شکنی کے راستے پر چلیں گے تو ریاست کو قانون شکنوں سے نمٹنا آتا ہے،پیپلز پارٹی کے رہنما قمر زمان کائرہ نے کہا کہ حکومت کے رویئے میں اس وقت جو سختی ہے اس کی وجہ خود عمران خان کا رویہ ہے، وزیرمملکت برائے پٹرولیم مصدق ملک نے کہا کہ پٹرول کی سبسڈی کیلئے تفصیلی کام ہوچکا ہے، سبسڈائز پٹرول کی پالیسی آئندہ چھ ہفتوں میں نافذ کرنے میں کامیاب ہوجائیں گے۔ احسن اقبال نے کہا کہ حکمراں اتحاد کے اجلاس میں اکثریت کی رائے تھی کہ عمران خان ملک کے خلاف بغاوت کررہے ہیں، اجلاس میں فیصلہ ہوا ہے کہ تحریک انصاف نے بغاوت کا علم بلند کیا ہے اس کے خلاف شفاف تحقیقات ہونی چاہئے، لاہور اسلام آباد میں سب نے دیکھا کس طرح قانون کی دھجیاں بکھیری گئیں، زمان پارک میں دہشتگرد تنظیموں سے متعلق افراد کی شناخت بھی ہوئی، شہنشاہ معظم عدالت میں پیش نہیں ہوئے عدالت ان کے پاس چل کر گاڑی میں آئی، عمران خان آرمی چیف اور قومی سلامتی کے اداروں کیخلاف بیرون ملک مہم چلارہے ہیں، عمران خان اپنی انا کیلئے ملک دشمنی کی آخری حد تک جانے کو تیار ہیں۔احسن اقبال کا کہنا تھا کہ جب تک عمران خان اپنی روش ٹھیک نہیں کریں گے بات کس طرح ہوسکتی ہے، اس وقت عمران خان سے بات کرنا ان کے رویے کو سند قبولیت دینا ہے، عمران خان اپنی غلطیوں پر سجدہ سہو کرلیں تو بات چیت کا سوچا جاسکتا ہے، ریاست نے اس طرح ہتھیار ڈالے تو کسی بھی انتہاپسند گروپ کیلئے کھلا میدان ہے، عمران خان اپنی پارٹی کو ہٹلر کی نازی پارٹی کی طرز پر استوار کررہے ہیں۔ احسن اقبال نے کہا کہ مظلوم وہ ہوتا ہے جو عدالت کے رحم و کرم پر ہوتا ہے، مظلوم وہ ہوتا ہے جو صبح نو بجے عدالت میں پیشی پر نہ پہنچے تو اس کی ضمانت منسوخ ہوجاتی ہے، جس شخص کیلئے عدالت رات آٹھ بجے تک کھلی رہے اور جج انتظار کریں وہ تو طاقتور ہے،جس شخص کیلئے ہائیکورٹ کے جج انتظار کرتے رہیں اور اپنے پروانے گاڑی میں بھیج کر دستخط کروائیں وہ ظالم ہے، اس وقت مظلوم پاکستان کا نظام انصاف اور پولیس بنی ہوئی ہے۔ احسن اقبال کا کہنا تھا کہ اس وقت ہمارا ووٹر ہم سے ناراض ہے کہ عمران خان کو پکڑ کیوں نہیں رہے، ہم نے عدالتوں میں پیشیاں بھگتیں مگر جتھے لے کر نہیں گئے، مجھے وزیرداخلہ ہوتے ہوئے رینجرز نے عدالت میں داخل نہیں ہونے دیا، ہم بھی چاہتے تو جتھے لے کر عدالت پر حملہ آور ہوسکتے تھے، ہم نے چار دن کی تکلیف کاٹی مگر نظام سے سرخرو ہو کر نکلے، مریم نواز اور ن لیگ کی دیگر قیادت عدالتوں سے میرٹ پر بری ہوئی ہے، یہاں ایک شخص اداروں کے پرخچے اڑارہا ہے مگر اسی پر اداروں کی مہربانی ہورہی ہے۔وزیرمملکت برائے پٹرولیم مصدق ملک نے کہا کہ پٹرول کی سبسڈی کیلئے تفصیلی کام ہوچکا ہے، سبسڈائز پٹرول کی پالیسی آئندہ چھ ہفتوں میں نافذ کرنے میں کامیاب ہوجائیں گے، پٹرول کیلئے امیر سے زیادہ پیسے لے کر غریب کیلئے استعمال کیے جائیں گے، پٹرول کی قیمت 300روپے ہوگی تو 350روپے رکھی جائے گی، تمام ڈیلرز یہ اضافی پچاس روپے فی لیٹر آئل مارکیٹنگ کمپنیوں کو جمع کروائیں گے، نیشنل بینک میں ایسکرو اکاؤنٹ کھول جائے گاجہاں یہ اضافی پچاس روپے جمع ہوں گے، ایسکرو اکاؤنٹ کے ذریعہ غریبوں کو پٹرول پر سبسڈی دی جائے گی۔میزبان شاہزیب خانزادہ نے پروگرام میں تجزیہ پیش کرتے ہوئے کہا کہ عمران خان کا مقابلہ کس طرح کرنا ہے، حکومتی اتحاد نے اس پر غور کیلئے سر جوڑلیے ہیں، وزیراعظم کی زیرصدارت اتحادیوں اور پی ڈی ایم رہنماؤں کا طویل اجلاس ہوا، اطلاعات کے مطابق اجلاس میں عمران خان سے مذاکرات کے بجائے سختی سے نمٹنے پر بات ہوئی ہے، دوسری طرف عمران خان حکومت اور ریاستی اداروں پر مسلسل دباؤ بڑھارہے ہیں، عمران خان نے ایک بار پھر اپنے قتل کی سازش کا الزام دہرادیا ہے، وزیراعظم شہباز شریف نے پاک فوج اور اس کے سربراہ کیخلاف بیرون ملک مہم کی مذمت کرتے ہوئے کہا ہے کہ آرمی چیف کے خلاف مہم ناقابل برداشت اور اداروں کیخلاف سازش کا تسلسل ہے، عمران خان اداروں اور ان کے سربراہوں کو اپنی گندی سیاست میں گھسیٹ کر آئین شکنی کررہے ہیں۔