لگتا ہے حکومت نے عمران کو ریاست کا اولین دشمن قرار دینے کا فیصلہ کیا ہے،زلمے خلیل

واشنگٹن (این این آئی)امریکا کے سابق مندوب برائے افغانستان زلمے خلیل زاد نے پی ٹی آئی چیئرمین عمران خان کے حق میں ایک اور بیان دیدیا۔ٹوئٹر پر جاری بیان میں زلمے خلیل زاد نے کہا کہ لگتا ہے حکومت نے عمران خان کو ریاست کا اولین دشمن قرار دینے کا فیصلہ کیا ہے، ایسے اقدامات پاکستان کے سیاسی، معاشی اورسکیورٹی بحران کوگہرا کردیں گے۔انہوں نے کہا کہ اشارے مل رہے ہیں کہ پارلیمنٹ سپریم کورٹ سے عمران خان کو نااہل کرنے کا کہہ سکتی ہے، اس سے بین الاقوامی سپورٹ کم ہوجائیگی، پہلے ہی کچھ ممالک طے شدہ سرمایہ کاری منصوبے معطل کرچکے ہیں، آئی ایم ایف سپورٹ اب تک مشکوک ہے۔اس سے قبل دفترخارجہ نے زلمے خلیل کی پاکستان کے اندرونی معاملات میں مداخلت پر سخت ردعمل دیا تھا۔ ترجمان نے کہا تھا کہ پاکستان کو خود کو درپیش چیلنجز سے نمٹنے کے لیے کسی سے مشورے کی ضرورت نہیں، پرعزم قوم موجودہ مشکل صورت حال سے مضبوطی سے نکلے گی۔