الیکشن بروقت کروانے کیلئے عمران خان ہر کسی کے ساتھ بیٹھنے کو تیار ہیں ،شہباز گل

فیصل آباد(نمائندہ جنگ)رہنما تحریک انصاف شہباز گل نے کہا عمران خان الیکشن بروقت کروانے کیلئے ہر کسی کے ساتھ بیٹھنے کو تیار ہیں مگر انکی چوریاں معاف کرنے اور انکو این آر او دینے کیلئے تیار نہیں ، یہ لوگ الیکشن سے بھاگنے کیلئے کسی بھی قسم کا کام کرسکتے ہیں۔ ان خیالات کا اظہار انہوں نے پی پی 111اور پی پی 112سے انتخاب کیلئے اپنے کاغذات نامزدگی کی سکروٹنی کے سلسلہ میں ریٹرننگ آفیسر کے پاس پیش ہونے کے بعد میڈیا سے گفتگو میں کیا۔ شہباز گل نے مزید کہا ن لیگ کی 35 سالہ کارکردگی اور ملک کا بیڑۃ غرق کرنے پر عوام انہیں مسترد کر چکے ہیں ،ن لیگ نے جو بویاوہ کاٹ رہی ہے ،اس کی اہمیت صفر ہو چکی ہے،4سال میں عوامی خدمت کے منصوبے دینے پر پی ٹی آئی مقبول ترین جماعت ہے جس کو صفر کرنے کی کوشش میں عمران خان سمیت پی ٹی آئی قیادت کیخلاف مقدمات درج اور دہشتگرد قرار دیا جارہا ہے ، اب کس طرح ترازو کے پلڑے کے برابر کر رہے ہیں۔