حج آپریشن 2023ون ونڈو سہولت کے تحت مکمل ہوگا

لاہور (نیوزرپورٹر) حج آپریشن 2023ء ون ونڈو سہولت کے تحت مکمل کرنے کا فیصلہ کیا گیا ہے، حاجی کیمپ میں ائر کنڈیشنڈ مارکی لگائی جائیگی ۔حج ڈائریکٹوریٹ کے افسران نے بینکوں اور ایئر لائنز کے نمائندوں کے ساتھ اجلاس منعقد کیا۔ ڈائریکٹر حج لاہور اقرار احمد اور ڈپٹی ڈائریکٹر مجیب اکبر شاہ نے شرکت کی۔ اجلاس میں فیصلہ کیا گیا کہ عازمین حج کی روانگی کے موقع پر بینک اور ایئر لائنز ایئر کنڈیشنڈ مارکی میں اپنے کاؤنٹر لگائیں گے۔ عازمین حج کو ٹکٹ، پاسپورٹ اور دیگر سہولیات ایک ہی چھت تلے مہیا کی جائیں گی۔ زرمبادلہ حاصل کرنے کے خواہشمند عازمین بینکوں کے کاؤنٹر سے پاکستانی روپے کے عوض ریال حاصل کر سکیں گے ۔ بینکوں کو حاجیوں کی ضرورت کے مطابق سعودی ریال کا انتظام کرنے کی ہدایت کر دی گئی ہے۔