پاکستان کوقرضوں اورسودکی ادائیگی کےلیے3ارب ڈالرزدرکار

اسلام آباد (مہتاب حیدر ) اسٹیٹ بینک کے تحت گھٹتے ہوئے زرمبادلہ ذخائر کے عین درمیان ملک کے بیرونی قرضوں اور ان پر سود کی ادائیگی کے لیے رواں مالی سال کی آخری سہ ماہی (اپریل تا جون) تین ارب ڈالرز درکار ہوں گے۔ ایک متعلقہ اہم پیش رفت کے تحت پاکستانی حکام نے چین کی جانب سے دو ارب ڈالرز سیف ڈپازٹ میں ملنے کی تصدیق کردی ہے ۔ گزشتہ 10مارچ تک پاکستان کے زرمبادلہ کا حجم 4ارب30کروڑ ڈالرز تھا ۔آئی ایم ایف اگر پاکستان کو قرضے کی قسط ادا کرنے میں لیت ولعل سے کام لیتا رہا تو مالی انتظام کے لیے پلان بی مرتب کرنا ہوگا ۔ رابطہ کرنے پر وزارت خزانہ کے ایک اعلیٰ افسر نے کہا اگر پلان اے نے کام نہ کیا تو پلان بی مرتب کیا جائے گا۔ دستیاب تفصیلات کے مطابق پاکستان کو قرضوں اور سود کی مد میں ادائیگی کےلیے اپریل 2023ء میں31کروڑ 60لاکھ ڈالرز ادا کرنے ہیں ۔ مئی میں75کروڑ 30لاکھ ڈالرز دینے ہوں گے۔ جون میں قرضوں اور سود کی مد میں ادائیگی کا حجم ایک ارب 89کروڑ 40لاکھ ڈالرز ہوگا۔ پاکستان کو جہاں ایک طرف جہاں دو دھاری تلوار کا سامنا ہے وہیں بیرونی قرضوں کی مد میں23ارب ڈالرز بھی ادا کرنے ہیں ۔