منی لانڈرنگ کیس، احتساب عدالت میں سلمان شہباز،ہارون یوسف کے متعلق ضمنی رپورٹ جمع

لاہور (نیوز رپورٹر ) لاہور کی احتساب عدالت میں وزیراعظم شہباز شریف اور انکے اہل خانہ کےخلاف منی لانڈرنگ ریفرنس میں نیب کی طرف سے شریک ملزمان سلمان شہباز اور ہارون یوسف سے متعلق سپلیمنٹری رپورٹ جمع کرا دی گئی جس کے بعد کیس پر مزید سماعت 4 اپریل تک ملتوی کردی گئی، احتساب عدالت نمبر 9 کے جج قمر الزمان نےبدھ کو کیس کی سماعت کی ، وزیر اعظم شہباز شریف کی جگہ ان کے پلیڈر انوار حسین عدالت میں پیش ہوئے، احتساب عدالت نے وزیراعظم کو حاضری سے مستقل استثنیٰ دے رکھا ہے ۔عدالت نے حمزہ شہباز کی حاضری معافی کی درخواست کمر کی تکلیف کے باعث منظور کر لی۔نیب ریفرنس میں شہباز شریف، حمزہ شہباز، سلیمان شہباز، رابعہ شہباز اور نصرت شہباز سمیت 16افراد کو فریق بنایا گیا ہے۔