وزیر داخلہ کی تقریر ہارے ہوئے جواری کی تھی ‘فواد چوہدری

لاہور(جنگ نیوز)تحریک انصاف کے مرکزی رہنماءفواد چوہدری نے کہاہےکہ ڈمی پارلیمان میں حکومت نے عدلیہ پر حملہ کردیاہے ‘رانا ثناءاللہ کی تقریر ہارے ہوئے جواری کی تقریر تھی ‘ صوبائی انتخابات میں ایک دن کی تاخیر بھی آئین سے ماورا ہو گی‘اب وکٹ اٹھا کر بھاگو مت، مقابلہ کرو ۔ سوشل میڈیاپر اپنے بیان میں فواد چوہدری کا کہنا تھاکہ سپریم کورٹ کو دھمکیاں دینے کے بعد پاؤں میں پڑجاؤکہ خداکیلئے الیکشن نہ کروائیں ہم ہار جائیں گے ۔انہوں نے مزیدکہاکہ آج ڈمی پارلیمان میں اعلیٰ عدلیہ کو ناقابل تلافی نقصان پہنچایا گیا ۔وکلاءاورپاکستان کے شہری عدلیہ کے وقار اور قانون کے لئے کھڑے ہوں گے ‘پی ڈی ایم حکومت الیکشن سے فرار کیلئے آئین کو ردی کی ٹوکری میں ڈالنا چاہتی ہے ‘اس کے خلاف مزاحمت کیلئے تیار ہوجائیں ۔این این آئی کے مطابق فواد چوہدری کا کہنا تھاکہ رانا ثناء اللّٰہ نے عدالت کو پیغام دیا کہ 90 دن میں الیکشن کے حکم پر عمل نہیں کریں گے۔ امپورٹڈ حکمرانوں نے ایک بار پھر سپریم کورٹ کے خلاف اعلان جنگ کردیا ہے‘یہ گروہ پہلے بھی عدالت عظمیٰ پر حملہ کرچکا ہے۔