پاکستان میں آج پہلا روزہ، بھارت بنگلہ دیش میں چاند نظر نہیں آیا

23 مارچ ، 2023

اسلام آ باد ( نیو زرپورٹر،ٹی وی رپورٹ) مرکزی رویت ہلال کمیٹی کے اعلان کے مطابق پاکستان میں رمضان المبارک 1444 ہجری کا چاند نظر آگیا ہے، پہلا روزہ آج 23 مارچ جمعرات کو ہوگا۔مرکزی رویت ہلال کمیٹی پاکستان کا اجلاس چیئرمین کمیٹی مولانا سید عبد الخبیر آزادکی زیرصدارت پشاورمیں ہوا۔ اجلاس میں مرکزی و زونل ممبران، وزارت مذہبی امور و دیگر اداروں کے نمائندے بھی شریک ہوئے۔اجلاس کے اختتام پر چیئرمین مرکزی رویت ہلال کمیٹی مولانا سید عبدالخبیر آزاد نے اعلان کیا کہ پاکستان میں رمضان المبارک کا چاند نظر آگیا، چاند نظر آنے کی شہادتیں مردان کے علاقے گڑیالہ، رحیم یارخان، بہاولپور سے موصول ہوئیں۔چیئرمین کمیٹی کے مطابق بہاولپور سے بھی چار شہادتیں موصول ہوئیں، مرکزی رویت ہلال کمیٹی کے ارکان درمیان شہادتوں پر مشاورت کے بعد فیصلہ کیا گیا۔اعلان رات دس بجے کیا گیا جس کی وجہ سے نمازی تراویح کا انتظار کرتے رہے۔ادھربھارت اور بنگلہ دیش میں کہیں بھی رمضان المبارک کا چاند نہیں آیا لہذاان ملکوں میں پہلا روزہ 24 مارچ بروز جمعہ کو ہو گا۔