T20سیریز،افغانستان نے تاریخ رقم کردی، پاکستان کیخلاف پہلی فتح

25 مارچ ، 2023

کراچی (نمائندہ جنگ) افغانستان نے پاکستان کو ٹی ٹوئنٹی سیریز کے پہلے میچ میں شکست دیکر تاریخ رقم کردی ، یہ ٹی ٹوئنٹی اور کسی بھی انٹرنیشنل میچ میں پاکستان کیخلاف افغان ٹیم کی پہلی فتح ہے،شارجہ میں کھیلے گئے میچ میں گرین شرٹس نے ٹاس جیت کر بیٹنگ کا فیصلہ کیا جو درست ثابت نہ ہوسکا، افغان اسپنرز اور فاسٹ بالرز نے پاکستانی بلے بازوں کو چکرا کر رکھ دیا، پوری ٹیم 92رنز تک محدود رہی،پاکستانی باولرز نےآخر تک مزاحمت دکھائی اور لو اسکورنگ اور یکطرفہ میچ کو بھی دلچسپ بنادیا تاہم افغان ٹیم نے 4وکٹوں کے نقصان پر 13گیندیں قبل ہدف حاصل کرلیا ، محمد نبی اور نجیب اللہ زردان نے پانچویں وکٹ کے لئے53رنز کی ناقابل شکست شراکت سے اپنی ٹیم کو ہدف کے حصول میں آسانی کردی،محمد نبی کو آل راونڈ پرفامنس پر مین آف دی میچ ایوارڈ سے نواز اگیا،انہوں نے 38رنز بنانے کیساتھ ساتھ 2وکٹیں بھی حاصل کیں۔کپتان شاداب خان نے پہلے اپنے بیٹسمنوں کو آزمانے کا فیصلہ کیا جو ان کے کھلاڑیوں کے بھیانک خواب بن گیا،پاکستانی کھلاڑی ریت کی دیوار ثابت ہوئے اس کے سات کھلاڑی دوہرے ہندسے کو نہ چھو سکے، پاکستان کی جانب سے 17کے مجموعی اسکور پر محمد حارث، فضل حق فاروقی کی گیند پر اونچا شارٹ کھیلنے کی کوشش میں اپنی وکٹ گنوا بیٹھے، 22کے مجموعی اسکور پر پاکستان کو دوسری وکٹ کا نقصان اٹھانا پڑا جب عبداللہ شفیق کھاتا کھولے بغیر ہی آوٹ ہوگئے،39کے مجموعی اسکور پر انٹرنیشنل کیرئیر کا پہلا میچ کھیلنے والے صائم ایوب کی مزاحمت بھی 17رنز پر دم توڑ گئی ، 39ہی کے مجموعی اسکور پر ڈیبوڈنٹ طیب طاہر بھی 16رنز بنانے کے بعد راشد خان کی گیند پر انہیں ہی کیچ دے بیٹھے ، اعظم خان بھی کوئی رن بنائے بغیر آوٹ ہوگئے ، کپتان شاداب 12رنز بناکر آوٹ ہوئے، فہیم اشرف اور نسیم شاہ نےبالترتیب 2،2رنز بنائے، عماد وسیم 18رنز بناکر پویلین لوٹے ، زمان خان 8اور احسان اللہ 6رنز پر ناٹ آوٹ رہے۔ جواب میں افغان ٹیم کا آغاز بھی اچھا نہ رہا ، احسان اللہ نے اپنے ڈیبیو کی پہلی ہی گیند پر ابراہیم زدران کو آوٹ کردیا، افغا ن ٹیم کو پہلا نقصان 23کے مجموعی اسکور پر اٹھانا پڑا ، ایک گیند بعد احسان اللہ نے اپنی گلبدین کو بھی آوٹ کردیا ، وہ کھاتا کھولے بغیر ہی پویلین لوٹ گئے، 27کے مجموعی اسکور پر افغان ٹیم کو تیسرا نقصان اس وقت اٹھانا پڑا جب نسیم شاہ کی گیند پر عبداللہ شفیق نے شاندار کیچ لیتے ہوئے رحمان اللہ گرباز کی اننگ کا خاتمہ کردیا ، 45رنز کے مجموعی اسکور پر عماد وسیم نے کریم جنت کی وکٹیں بکھیر دیں ، 4کھلاڑیوں کے آوٹ ہونے کے بعد محمد نبی اور نجیب اللہ زدران نے محتاط کھیل پیش کرتے ہوئے اننگ کو آگے بڑھایا اور 13گیندیں قبل ہی ہدف حاصل کرلیا۔ محمد نبی 38اور نجیب اللہ 17رنز بناکر ناقابل شکست رہے۔ میچ میں پاکستان کی جانب سے چار کھلاڑیوں احسان اللہ، صائم ایوب ، طیب طاہر اور زمان خان نے ڈیبیو کیا ۔ افغانستان کی جانب سے فضل حق فاروقی، مجیب الرحمان اور محمد نبی نے 2، 2 جبکہ عظمت اللہ، نوین اور راشد خان نے ایک ایک کھلاڑی کو آؤٹ کیا۔افغانستان کے خلاف پاکستان کرکٹ ٹیم 20 اوورز میں 92 رنز ہی بناسکی جو پاکستان کا مجموعی طور پر پانچواں کم ترین اسکور ہے جبکہ مکمل 20 اوورز کھیلنے کے بعد یہ گرین شرٹس کا سب سے کم اسکور ہے۔اس سے قبل آسٹریلیا کے خلاف 74، ویسٹ انڈیز کے خلاف 82، انڈیا کے خلاف 83 اور انگلینڈ کے خلاف 80 رنز پر آؤٹ ہوچکی ہے۔ پاکستانی کر کٹ ٹیم کے کپتان شاداب خان نے کہا ہے کہ افغانستان کے خلاف سیریز میں واپس آنے کی کوشش کریں گے، پہلے ٹی ٹوئنٹی میں شکست کے بعد انہوں نے کہا کہ ٹیم میں زیادہ تر کھلاڑی نئے ہیں، ہم انہیں بڑی کر کٹ کا تجربہ دلارہے ہیں، نئے کھلاڑیوں پر بڑے میچ کا دبائو ہوتا ہے، مین آف دی میچ محمد نبی نے کہا کہ انہین خوشی ہے کہ انہوں نے مشکل وقت میں38رنز بنائے یہ رن سنچری سے زیادہ قیمتی ہیں، افغان کپتان راشد خان نے کہا کہ ہمارے کھلاڑیوں نے کھیل کے تمام شعبے میں شان دار کار کردگی کا مظاہرہ کیا، اگلے میچ میں بھی اسی اسپرٹ اور جذبہ کے ساتھ جائیں گے۔